ԵՐԵՎԱՆ, 9 հունիսի — Sputnik. Կասպերսկու լաբորատորիայի աշխատակիցները նախազգուշացնում են` օգտատերերի անձնական տվյալների ստացման համար սմարթֆոնները գտնվում են հարձակման նոր մեթոդներ մշակող կիբերհանցագործների ուշադրության կենտրոնում։ Sputnik Արմենիայի հետ զրույցում ասաց Հայաստանում և Վրաստանում Կասպերսկու լաբորատորիայի տարածաշրջանային ներկայացուցիչ Արմեն Կարապետյանը։
Համակարգչային անվտանգության ոլորտում միջազգային առաջնորդ «Կասպերսկու լաբորատորիա» ընկերությունը ուրբաթ Երևանում անցկացրեց «Հայացք ֆինանսական անվտանգությանը» թեմայով սեմինար` ֆինանսական ընկերությունների ներկայացուցիչների համար։
Միջոցառման նպատակն էր մասնագետներին նոր կիբերվտանգների հետ ծանոթացնելը, հասկանալ, թե ինչպես կարելի է դրանց հակազդել, ինչպես նաև կիբերանվտանգության ոլորտում միտումների ներկայացումը։
ՏՏ անվտանգության և բիզնես
Ինչպես նշեց Կարապետյանը` միջոցառումնը վերաբերում է ֆինանսական հատվածին։
«Սա հենց այն է, ինչն ամենից հաճախ է գրավում չարագործների ուշադրությունը։ Պատճառը պարզ է` մեծ գումարներ կան այնտեղ։ Հայաստանը, մյուս երկրների նման, կարող է ենթարկվել հաքերական հարձակումներին, այն 100%–ով պաշտպանված չէ։ Հենց այդ պատճառով դեռ շատ անելիքներ կան այս ոլորտում», – ավելացրեց նա։
Կարապետյանի խոսքով` հաքերներն ավելի ժամանակակից են գործում, իսկ ջարդելու մեթոդները բազմազան են։
«Մի կողմից մենք ավելի ուժեղ ենք դառնում, մյուս կողմից` հաքերները նոր մեխանիզմներ են մշակում։ Լաբորատորիան մի շարք լուծումներ ունի փոքր, միջին, խոշոր բիզնեսի և պետական կառույցների համար։ Մենք տարբեր մոտեցումներ ենք առաջարկում բիզնեսի պաշտպանության համար։ 20 տարի շարունակ մենք զբաղվում ենք թվային աշխարհի պաշտպանությամբ», – ասաց Կարապետյանը։
Բիզնեսի պաշտպանության տարրական մեթոդներ
Փորձագետը մի քանի խորհուրդ տվեց իրենց տվյալներն ու ֆինանսները պահպանել ցանկացող օգտատերերին։ Առաջին հերթին անհրաժեշտ է, որ օգտատերերը գիտակցեն լիցենզավորված ծրագրերի հետ աշխատելու կարևորությունը։
«Իհարկե, միշտ էլ գրավում է անվճար ծրագիրը, սակայն դա մեծ ռիսկ է սարքի համար։ Բոլոր լիցենզավորված ծրագրերը անհրաժեշտ է ժամանակին թարմացնել։ Երկրորդ քայլը հակավիրուսային ծրագրի տեղադրումն է։ Երրորդը` օգտատերը միշտ պետք է հետևի «հիգիենայի» կանոններին։ Չի կարելի բացել կասկածելի նամակները և անցնել «սենսացիոն» վերնագրեր և անվանումներ պարունակող հղումներով», – ասաց Հայաստանում և Վրաստանում Կասպերսկու լաբորատորիայի տարածաշրջանային ներկայացուցիչը։
Պետք չէ բոլորին ի ցույց դնել անձնական տվյալները. դեպքեր են լինում, երբ օգտատերերը սոցցանցում տեղադրում են վարորդական իրավունքի, անձնագրի լուսանկարներ կամ տեղեկություն իրենց գտնվելու վայրի մասին։
Կարապետյանի խոսքով` պետք չէ մոռանալ գաղտնագրերի հաճախակի փոփոխման, ինչպես նաև տարբեր ռեսուրսներում տարբեր գաղտնագրերի օգտագործման անհրաժեշտության մասին։
Ֆինանսական հաստատությունների թեման շոշափելիս փորձագետը նշեց, որ հայկական բանկերը վերջին տարիներին որոշակի աշխատանք են տարել` ուղղված անվտանգության մակարդակի բարձրացմանը, սակայն այդ ոլորտում դեռ շատ անելիքներ կան։
