ԵՐԵՎԱՆ, 9 հունիսի — Sputnik. Հայաստանի պետական գնումների համակարգում արված փոփոխություններն ուղղված են գործընթացի հեշտացմանը, մրցունակության բարձրացմանը, ինչպես նաև փոքր և միջին բիզնեսի աշխատանքի պարզեցմանը։
«Փոփոխություններ են արվել մրցույթներին մասնակցողների համար։ Այսուհետև գնումների համար անհրաժեշտ փաստաթղթերի ցուցակը հասանելի է առցանց ռեժիմով։ Դա կհեշտացնի մասնակիցների նախապատրաստումը, ինչպես նաև զգալիորեն կկրճատի նախկինում անհրաժեշտ փաստաթղթերի փաթեթը»,– ասաց ֆինանսների նախարարության աշխատակազմի պետական ներքին ֆինանսական հսկողության և պետական գնումների մեթոդաբանության վարչության պետ Սերգեյ Շահնազարյանը։
Նրա խոսքով` պարզեցվել են միջին և փոքր բիզնեսի տնտեսվարողների` մրցույթներին մասնակցելու պայմանները։ 5 մլն դրամի գնում կատարելու պարագայում փոքր և միջին բիզնեսի գործարարների նկատմամբ որակավորման չափորոշիչներ չեն կիրառվելու, այնինչ նախկինում պետք էր ներկայացնել փաստաթղթերի որոշակի ցանկ (ֆինանսական հաշվետվություն, գործունեության ժամկետ, տեղեկություն աշխատակիցների համար և այլն)։
«Առաջին քայլերն անող ընկերություններին դա թույլ կտա կապ հաստատել պատվիրատուների հետ»,– ասաց Շահնազարյանը։
Փոփոխությունները վերաբերել են նաև նրանց, ովքեր ժամկետանց հարկային պարտավորություններ ունեն։ Նոր օրենքի համաձայն, եթե տնտեսվարողի ժամկետանց հարկային պարտավորությունները չեն գերազանցում 50 000 դրամը, ապա նա նույնպես հնարավորություն ունի մասնակցելու գնումներին։
Պետական գնումների 7 տեսակներից մնացել են 4-ը. էլեկտրոնային մրցույթ, մրցույթ, գնանշում և գնումներ մեկ անձից։ Շահնազարյանի խոսքով` համակարգի պարզեցումը միտված է կոռուպցիոն ռիսկերի նվազմանը։
Նախարարությունը մեծ նշանակություն է հատկացնում նաև էլեկտրոնային համակարգի անցմանը։ Գնումների գործընթացի մասին տվյալները հասանելի են gnumner.am կայքում։ Կայքը գրանցման հնարավորություն է ընձեռում, իսկ հետաքրքրող հայտի մասին տվյալներն ուղարկվում են օգտատիրոջ փոստին։
Էլեկտրոնային գնումները թույլ են տալիս ավտոմատ գրանցվել համակարգում, առանց լրացուցիչ փաստաթղթեր ներկայացնելու ֆինանսների նախարարություն։
Գնումների մասին նոր օրենքը, որը կառավարությունն ընդունել էր 2016 թվականի վերջին, ամբողջությամբ ուժի մեջ է մտել 2017 թվականի ապրիլի 25-ին։
