Հայկական ժամանակ. «Արտագաղթում են»
Թերթի տեղեկություններով` նախկին վարչապետ Հովիկ Աբրահամյանի մտերիմները հերթով արտագաղթում են։
«Մեզ հայտնի դարձավ, որ պատրաստվում է արտագաղթել Արտաշատի քաղաքապետի ժամանակավոր պաշտոնակատար, փոխքաղաքապետ Գագիկ Պողոսյանը։ Հովիկ Աբրահամյանի այս ազգականը նախկին վարչապետի հետ տևական ժամանակ է, ինչ քննարկում էր Գերմանիայում բիզնես հիմնելու հարցը։ Վերջերս էլ նրանք երկուսով եղել են Համբուրգում և պատրաստվում են արտադրական ձեռնարկություն հիմնել։ «Հրապարակ» թերթը գրել էր, որ արտագաղթել է նաև Հովիկ Աբրահամյանի եղբայրը` Ջոնիկ Աբրահամյանը»,-գրում է թերթը։
Ժամանակ. «Նախագահ»
Թերթին հասած տեղեկություններով` Սերժ Սարգսյանը քննարկում է 2018 թվականին ՍԴ նախագահ Գագիկ Հարությունյանին ՀՀ նախագահ դարձնելու տարբերակը։
«Վերջինս 2004 և 2008 թթ. Ռոբերտ Քոչարյանի և Սերժ Սարգսյանի իշխանությունների համար անուրանալի ծառայություն է մատուցել։ Բացի այդ, «Հայաստան» հիմնադրամում մեծ ավանդ ունի։ Սփյուռքի գրեթե բոլոր շրջանակներում համարվում է չվարկաբեկված կամ քիչ վարկաբեկված հայաստանցի պաշտոնյա։ Հետևաբար, հաջորդ տարի, երբ լրանում է Գագիկ Հարությունյանի 70-ամյակը, և նա պետք է թողնի Սահմանադրական դատարանի նախագահի պաշտոնը, Սերժ Սարգսյանն առաջարկելու է նրան ՀՀ նախագահի պաշտոնը ստանձնել»,-գրում է թերթը։
Առավոտ. «Ճաշակի դեմ չեն պայքարում»
Թերթի խմբագրականն անդրադարձել է Հայաստանում ցուցադրվող սերիալներին, դրանց «կրթող» նշանակությանն ու ճաշակի թելադրանքին։
«Վերջերս ինձ հանդիպած մի անծանոթ համոզում էր պայքար ծավալել բոլոր տեսակի սերիալների դեմ, որովհետև դրանք փոխում են «հայի գենետիկ կոդը և ընդհանրապես ցեղասպանություն են»։ Ես հրաժարվեցի, նախ` այն պատճառով, որ երբեք ոչ մի բանի և ոչ մեկի դեմ պայքար չեմ ծավալել։ Իսկ մասնավորապես` չեմ կարծում, որ պետք է պայքար ծավալել մարդկանց նախասիրությունների դեմ… Ի դեպ, մենք տանը նույնպես սերիալ ենք նայում։ Երբ ազատ մեկուկես ժամ է լինում, մենք նայում ենք ամերիկյան հին սերիալ լեյտենանտ Կոլոմբոյի մասին։ Պիտեր Ֆալկը ստեղծել է տաղանդավոր մարդու կերպար, որը կոնկրետ ինձ մի կողմից սովորեցնում է լինել կյանքում համեստ, պարզ, հասարակ, իսկ մյուս կողմից` ուշադիր լինել բոլոր մանրուքների նկատմամբ»,-գրում է թերթը։
Ի դեպ, թերթի մեկ այլ տեղեկությամբ` այս օրերին քննարկվում է 2018 թվականի ապրիլից նշանակվելիք երեք փոխվարչապետների անունները` Կարեն Կարապետյան, Գագիկ Ծառուկյան և դաշնակցական որևէ գործիչ։
Հայոց աշխարհ. «2000 դրամանոց»
Հայաստանում շրջանառության մեջ են դրվելու 2000 դրամանոց թղթադրամներ։
«Թե երբ շրջանառության մեջ կդրվի թղթադրամը, կախված է Կենտրոնական բանկի խորհրդի որոշումից։ Երբ Կենտրոնական բանկի խորհուրդը վերջնական որոշում կայացնի և հաստատի այն, արդեն հստակ կլինեն թղթադրամի շրջանառության հետ կապված բոլոր ժամկետները»,-թերթի լրագրողի հետ զրույցում նշել է ԿԲ խոսնակ Հարություն Կբեյանը։
