ԵՐԵՎԱՆ, 7 հունիսի — Sputnik. Հայաստանում առաջին անգամ անցկացվող «Միսս ԱՊՀ» միջազգային գեղեցկության մրցույթում «Գրան-պրի» մրցանակին արժանացավ Հայաստանը ներկայացնող Շուշան Երիցյանը. ժյուրին նրան մրցույթի հաղթող ճանաչեց։
Գեղեցկուհին ասաց, որ հաղթանակն իր երկրին է նվիրում և հուզվեց։
«Ես տարբեր մրցույթների եմ մասնակցել: Չեմ կարող բառերով արտահայտել այն, ինչ հիմա եմ զգում: Անբացատրելի զգացողություն է: Սա իմ կյանքի լավագույն օրերից մեկն է»,- ասաց Շուշան Երիցյանը:
Մրցույթում Հայաստանը երեք ներկայացուցիչ ուներ՝ Արփինե Բալայանը, Մարինե Մարգարյանը և Շուշան Երիցյանը։
Ընդհանուր առմամբ մրցույթին մասնակցեց 18-ից 25 տարեկան 24 գեղեցկուհի, որոնք հաղթել էին իրենց երկրներում անցկացված նախընտրական փուլում։
Մրցույթի եզրափակիչ փուլի ժյուրիի կազմում ընդգրկված էին ոլորտի 11 փորձառու մասնագետներ` 3-ը` Հայաստանից, 4-ը՝ Ռուսաստանից և 4-ը՝ ԱՊՀ անդամ այլ երկրներից։ «Միսս ԱՊՀ 2017» գեղեցկության մրցույթն ընդգրկում է 25 միլիոնանոց լսարան: Մրցանակային ֆոնդը կազմում է 16,2 մլն ՀՀ դրամ: Միջոցառման աջակիցների թվում են ԱՊՀ Միջպետական կոմիտեն, ՀՀ տնտեսական զարգացման և ներդրումների նախարարությունը, Երևանի քաղաքապետարանը:
