ԵՐԵՎԱՆ, 7 հունիսի — Sputnik. ՀՀ արտաքին գործերի նախարարությունը հայտարարություն է տարածել Ֆեյսբուք սոցիալական ցանցի պաշտոնական էջում։
«Հորդորում ենք Իրանում գտնվող ՀՀ քաղաքացիներին զերծ մնալ իրավապահ մարմինների կողմից իրականացվող գործողությունների տարածքներ, մասնավորապես՝ Թեհրանի հարավային շրջաններ, և մարդաշատ վայրեր (մետրո, շուկա և այլն) այցելություններից»,- նշված է հայտարարության մեջ:
Արտակարգ իրավիճակներում հայտնվելու պարագայում խնդրում ենք անհապաղ կապ հաստատել Իրանում Հայաստանի դեսպանության հետ (e-mail: armiranembassy@mfa.am, հեռ.՝ (0098) 21 6670 4833, հասցե՝ Ջոմհուրի-ե Էսլամի պող., Ռազի պող., Օսթադ Շահրիյար փող., թիվ 32):
Նշենք, որ այսօր առավոտյան կրակոցներ են հնչել Իրանի խորհրդարանում և Թեհրանում 1979 թվականի Իսլամական հեղափոխության առաջնորդի` այաթոլա Հոմեյնիի դամբարանում:
Լրատվամիջոցների հրապարակումների համաձայն` զինված տղամարդը դամբարանում կրակ է բացել մարդկանց ուղղությամբ, մեկ ուրիշն էլ կրակոցներ է արձակել խորհրդարանի ներսում։ Ըստ իրանական «Ֆարս» գործակալության, երկու հարձակումների պատասխանատվությունը ստանձնել է «Իսլամական պետություն» ահաբեկչական խմբավորումը։
