ԵՐԵՎԱՆ, 6 հունիսի — Sputnik. «Եվրատեսիլ —2018»-ին Ռուսաստանը ներկայացնող Յուլյա Սամոյլովան ելույթ ունեցավ Երևանում «Միսս ԱՊՀ» մրցույթի եզրափակիչ փուլի ժամանակ։
Նա երկու երգ կատարեց, որոնցից մեկը հենց այն ստեղծագործությունն էր, որով պետք է հանդես գար Կիևում կազմակերպված «Եվրատեսիլի» ժամանակ։
Լրագրողների հետ զրույցում Սամոյլովան ասաց, որ հայերը շատ հյուրընկալ ժողովուրդ են։
«Այնպիսի զգացողություն է, ասես արդեն եղել եմ Հայաստանում։ Ինձ այստեղ տեսնելիս մարդիկ ասում էին՝ ինչ լավ է, որ նորից մեզ հետ ես։ Ասես մենք հին ու լավ ընկերներ ենք», — ասաց Սամոյլովան։
Նա խոստովանեց, որ իրեն դուր է եկել «Միսս ԱՊՀ — 2017» մրցույթի մթնոլորտը։
Խոսելով Պորտուգալիայում կայանալիք «Եվրատեսիլ — 2018»-ի մասին՝ նա ասաց. «Կարևորը, որ ամեն ինչ վերջապես ստացվի»։
«Թող որ անհասկանալի իրավիճակներ չլինեն։ Կարծում եմ՝ ամենակարևորը մրցույթից հաճույք ստանալն է, լավ պատրաստվելն ու լավ դրսևորվելը», — ասաց նա։
Սամոյլովան պետք է Ռուսաստանը ներկայացներ Կիևում անցկացված մրցույթում, սակայն Ուկրաինայի Անվտանգության ծառայությունը երեք տարով արգելել էր նրա մուտքը երկիր, քանի որ երգչուհին ելույթ էր ունեցել Ղրիմում։
Եվրոպայի հեռարձակողների միությունը փորձել էր կարգավորել հարցը և դատապարտել էր ուկրաինական իշխանությունների այդ քայլը, սակայն Կիևը որոշումը չէր փոխել։ Արդյունքում ռուսական «Առաջին ալիքը» հրաժարվեց «Եվրատեսիլ — 2017»-ի մասնակցությունից և հաղորդման հեռարձակումից։
