ԵՐԵՎԱՆ, 6 հունիսի — Sputnik. Հունիսի 6-ին, ժամը 18:00-ի սահմաններում ահազանգեր են ստացվել Երևան քաղաքի տարբեր վարչական շրջաններում, ինչպես նաև Արմավիրի մարզի Էջմիածին քաղաքում և շրջակա գյուղերում ուժեղ քամու հետևանքով առաջացած վնասների վերաբերյալ:
ՀՀ արտակարգ իրավիճակների նախարարությունը հայտնում է, որ ահազանգեր են ստացել շրջված տանիքների, ալեհավաքների, կոնստրուկցիաների, ծառերի, վնասված ջերմոցների և էլեկտրական լարերի վերաբերյալ:
ԱԻՆ-ը խոստանում է լրացուցիչ տեղեկություն հայտնել ավելի ուշ:
Երևանի քաղաքապետարանն էլ հայտնում է, որ այսօր արձանագրված ուժեղ քամին մայրաքաղաքում տարատեսակ վնասներ է պատճառել և ստեղծել է որոշակի անհարմարություններ: Երևանի քաղաքապետ Տարոն Մարգարյանի հանձնարարությամբ աշխատակազմի համապատասխան ծառայություններն արդեն իսկ ձեռնամուխ են եղել քամու հետևանքով պատճառված վնասները շուտափույթ վերացնելու աշխատանքներին:
