ԵՐԵՎԱՆ, 6 հունիսի — Sputnik. Հայաստանում հրեական համայնքի մշակութային ժառանգության պահպանությանն առնչվող հարցեր են քննարկել «Պատմամշակութային արգելոց-թանգարանների և պատմական միջավայրի պահպանություն ծառայություն» ՊՈԱԿ-ի տնօրեն Արա Թարվերդյանն ու Հայաստանում հրեական համայնքի ղեկավար Ռիմա Վարժապետյանը: Նրանք խոսել են «Գերեզմանոց» հուշարձանի հարակից տարածքի բարեկարգման ու ցանկապատման անհրաժեշտության մասին: Տիկին Վարժապետյանը շնորհակալություն է հայտնել «Պահպանության ծառայություն» ՊՈԱԿ-ին հուշարձանի պահպանությունն իրականացնելու համար, ցանկություն` նորոգված տեսնել դեպի գերեզմանատուն տանող խարխլված փայտյա կամուրջը:
![Еврейское кладбище в Вайоц Дзоре Еврейское кладбище в Вайоц Дзоре - Sputnik Արմենիա](https://cdn.am.sputniknews.ru/img/755/37/7553729_0:0:1600:1200_600x0_80_0_0_0e1ced9a15679933a3f25525f648e6cd.jpg)
«Պահպանության ծառայություն» ՊՈԱԿ-ի տնօրեն Արա Թարվերդյանի փոխանցմամբ` մշակութային ժառանգության պահպանությունը, հանրահռչակումը ՊՈԱԿ-ի իրավասությունների շրջանակում է և կազմակերպությունն էլ մտահոգ է գերեզմանատան պահպանությանն առնչվող խնդիրներով: Նրա համոզմամբ առկա խնդիրները հնարավոր է լուծել համատեղ ջանքերով:
![Обсуждение на тему состояния еврейского кладбища в Вайоц Дзоре Обсуждение на тему состояния еврейского кладбища в Вайоц Дзоре - Sputnik Արմենիա](https://cdn.am.sputniknews.ru/img/755/39/7553997_0:0:1000:701_600x0_80_0_0_c2370af8a4fc4c1cda98a2ef7f5607b5.jpg)
Հայաստան այցելած զբոսաշրջիկներից շատերը լինում են նաև Վայոց ձորում, ծանոթանում հայկական ու եղբայրական այլ ժողովուրդների մշակութային ժառանգությանը:
«Պահպանության ծառայություն» ՊՈԱԿ-ի տնօրենի համոզմամբ, վերջերս բացված Երևան-Թել-Ավիվ-Երևան ուղիղ չվերթը կակտիվացնի զբոսաշրջիկների հոսքը Հայաստան, նաև Արցախ:
«Համոզված եմ, որ Տաթևը տեսնելու ցանկություն ունեցող, նաև Արցախ ուղևորվող օտարերկրացին անպայման կանգառ կանի Վայոց ձորում` ծանոթանալու հրեական մշակույթի մի մասնիկին»,-իր խոսքում ասել է ՊՈԱԿ-ի տնօրենը:
Իսկ տեսնելու բան զբոսաշրջիկները Վայոց ձորի մարզում հաստատ ունեն: Մասնավորապես Եղեգնաձորի Երկրագիտական թանգարանի շենքի երկու սենյակներում ներկայում պահվում են գերեզմանոցի տարածքի պեղումներից հայտնաբերված դրամներ և այլ իրեր: Հրեական մշակույթն առավել ընդգրկուն ներկայացնելու համար տարածքն ընդլայնելու մտադրություն կա:
Արա Թարվերդյանն ու Ռիմա Վարժապետյանը հանդիպման ընթացքում անդրադարձել են նաև վերոնշյալ թեմային:
Պայմանավորվածություն է ձեռք բերվել առաջիկա քննարկմանը հրավիրել նաև շահագրգիռ այլ անձանց:
Վայոց Ձորի մարզում հրեական համայնքը կազմավորվել է 13-14-րդ դարերում, երբ մարզը տնտեսական և մշակութային վերելք էր ապրում: Հրեաները երկար ժամանակ բնակվել են այնտեղ` փոխառել հայկական մշակութային ավանդույթներ, ձևավորել նաև իրենցը:
![Վայոց Ձորի մարզի հրեական գերեզմանոցի հարակից տարածքը բարեկարգման կարիք ունի Վայոց Ձորի մարզի հրեական գերեզմանոցի հարակից տարածքը բարեկարգման կարիք ունի - Sputnik Արմենիա](https://cdn.am.sputniknews.ru/img/755/38/7553867_0:32:999:660_600x0_80_0_0_ee0fc00f88afb26b1335669553afdd9a.jpg)
![Վայոց Ձորի մարզի հրեական գերեզմանոցի հարակից տարածքը բարեկարգման կարիք ունի Վայոց Ձորի մարզի հրեական գերեզմանոցի հարակից տարածքը բարեկարգման կարիք ունի - Sputnik Արմենիա](https://cdn.am.sputniknews.ru/img/755/39/7553934_105:0:1000:563_600x0_80_0_0_04a35da4efd77ce1e5702f716ab07c9f.jpg)