ԵՐԵՎԱՆ, 6 հունիսի — Sputnik, Լաուրա Սարգսյան. Այսօր՝ Արամ Խաչատրյանի ծննդյան օրը, տեղի ունեցավ մաեստրոյի կիսանդրու բացման հանդիսավոր արարողությունը։ Քանդակը, որն արժանացավ Հայաստանի մշակույթի նախարար Արմեն Ամիրյանի բարձր գնահատականին, հեղինակել է հայտնի քանդակագործ Միքայել Սողոյանը։
«Հիանալի աշխատանք է։ Ի դեպ, կիսանդրին Հայաստան է բերվել ՀՀ վարչապետի ինքնաթիռով, երբ Կարապետյանը Մոսկվայից Երևան էր վերադառնում», — ասաց Ամիրյանը Sputnik Արմենիայի թղթակցի հետ զրույցում։
Նրա խոսքով` այդ քանդակն առանձնահատուկ մթնոլորտ կստեղծի պետական համերգասրահում։ Սողոյանը համագործակցելու մասին պայմանավորվածություն ունի մշակույթի նախարարության հետ։ Առաջիկայում Հայաստանում կհայտնվեն Խաչատրյանի կիսանդրու հեղինակի նոր աշխատանքները։
Այսօր տեղի ունեցավ նաև Արամ Խաչատրյանի անվան XIII միջազգային մրցույթի բացման արարողությունը։ Այս տարի մրցույթին կմասնակցեն միայն երգիչները:
«Խաչատրյանի երազանքն էր ստեղծել այնպիսի երաժշտություն, որի մասին կխոսի ամբողջ աշխարհը, որը ճանաչում կբերի ժողովրդին և երկրին։ Այս մրցույթը նրա երազանքի իրականացումն է», — ասաց Ամիրյանը։
Մրցույթը տարեցտարի նոր թափ է հավաքում և մեծ իրադարձություն է դառնում Հայաստանի մշակութային կյանքում։ Այս տարի մրցույթին կմասնակցի 43 երաժիշտ աշխարհի 13 երկրից։
Ժյուրիի կազմում ընդգրկվել են համաշխարհային հայտնի օպերային կատարողներ, այդ թվում՝ Գևորգ Հակոբյանն ու Իզաբել Բայրակդարյանը։ Ժյուրին գլխավորում է Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար Կոնստանտին Օրբելյանը։
