ԵՐԵՎԱՆ, 6 հունիսի – Sputnik. Հայ հրետանավորներն Արցախում կանխել են ադրբեջանական Զինված ուժերի նախաձեռնությունը, որոնք 2016 թվականի ապրիլին փորձել են ճեղքել Ակնայի (Աղդամի) ուղղությամբ. Sputnik Արմենիայի թղթակցին այս մասին պատմել է Լեռնային Ղարաբաղի Պաշտպանության բանակի սպա Հակոբ Մարտիրոսյանը։
«Ապրիլի 3–ին մենք հարձակման էինք սպասում։ Հետո շարասյուն նկատեցինք, որի կոորդինատներն անմիջապես փոխանցվեցին հրետանուն», – ասաց Մարտիրոսյանը։
Նրա խոսքով` ադրբեջանական կողմի կորուստների մասին ստույգ թվեր հայտնի չեն, սակայն շտապօգնության մեքենաների քանակից կարելի էր եզրակացնել, որ զոհեր շատ են եղել։
«Այդ պահին մեզ դիմակայող հրաձգային ու մոտոհրաձգային ստորաբաժանումներն ընդհանրապես չէին տեղաշարժվում։ Մեկումեջ աննպատակ կրակում էին սարերի ուղղությամբ` երևի փորձելով խուճապի մթնոլորտ ստեղծել», – նշեց Մարտիրոսյանը։
Ինչ վերաբերում է այսօրվա իրավիճակին, ապա, նրա խոսքով, ադրբեջանական կողմը ժամանակ առ ժամանակ ակտիվություն ցուցաբերում է, բայց ոչ հարձակման ու դիվերսիայի տեսքով։
«Բայց դա էլ է սպասելի։ Մենք միշտ պատրաստ ենք։ Եթե փոխհրաձգություն էլ լինում է, նրանք են սկսում, պատասխանն էլ ստանում են ու լռում»,– ընդգծեց մայորը։
