Քաղաքապետարանի ներկայացուցչի խոսքով` իրենք զբաղվել են Շաբոյանների ընտանիքների խնդիրներով։ Գիտեն, որ նրանք Վեդիի բնակիչ են եղել, այնտեղ են հաշվառված եղել, այնուհետև տեղափոխվել են Լաչին, ընտանիքի հայրն աշխատել է որպես պայմանագրային զինծառայող։ Ավելի ուշ ինչ-ինչ պատճառներով նրանք հայտնվել են Երևանում։ Նրանց առաջարկվել է Նոր Նորքի հանրակացարաններից մեկում մի փոքրիկ տարածք։ Քաղաքապետարանի համապատասխան բաժինների աշխատակիցներն այցելել են այդ ընտանիքին։
«Մենք այցելեցինք նրանց։ Ես տեսա, որ երեխաները վատառողջ էին, մայրիկն էլ ծննդատանն էր, նրանք դիմել էին նաև վարչական շրջանի առողջապահական բաժին, որպեսզի երեխաների առողջական խնդիրը կարգավորվեր։ Հետագայում ընտանիքի հայրիկից տեղեկացա, որ նրան առաջարկվել է աշխատանք, և նա աշխատում է որպես վարորդ»,- նշեց Խաչատրյանը։
Այսինքն` քաղաքապետարանն իր բոլոր պարտավորությունները կատարել է և շարունակելու է այդ ընտանիքին աջակցել այնքան ժամանակ, որքան դրա կարիքը լինի։
«Երեխաների իրավունքը ոտնահարված չէ, ծնողները պետք է ստանձնեն պատասխանատվությունը, որ իրենք էլ իրենց չափով աշխատանք ձեռք բերեն և կարողանան իրենց ընտանիքը պահել»,- նշեց Խաչատրյանը։
