ԵՐԵՎԱՆ, 2 հունիսի — Sputnik. «Ռուսհիդրո» էներգետիկ հոլդինգը բանակցություններ է վարում Սևան-Հրազդան ՀԷԿ կասկադի պոտենցիալ գնորդի հետ։ Այս մասին լրագրողներին հայտնել է ընկերության նախագահ Նիկոլայ Շուլգինովը։
«Մի գնորդ հայտնվեց ու անհետացավ։ Հիմա մյուսն է հայտնվել։ Բանակցություններ ենք վարում», — ասել է Շուլգինովը։
Ընդ որում` նա չի նշել, թե որ ընկերությունների հետ է բանակցություններ տարվում և որքան է կասկադի արժեքը։
Ապրիլին ընկերության փոխտնօրեն Ջորջ Ռիժինաշվիլին հայտնել էր, որ «Ռուսհիդրոյի» վարչությունը մոտակա ժամանակներում նախատեսում է դիտարկել Հայաստանի Սևան-Հրազդան ՀԷԿ կասկադի վաճառքի հնարավորությունը, քանի որ մենեջմենթի կողմից դրա օտարման մասին որոշումը բավականին կայուն է։
Սևան-Հրազդան կասկադն ունի Հրազդան գետի վրա տեղակայված 7 ճյուղավորված հիդրոէլեկտրակայան: Կայանների վրա տեղադրված է 561 ՄՎտ ընդհանուր հզորությամբ 21 հիդրոագրեգատ; կասկադի կայանների միջին տարեկան արտադրանքը 501 մլն կՎտ/ժ է, ինչը կազմում է 2009թ. ՀՀ էլեկտրաէներգիայի ընդհանուր արտադրության շուրջ 9%-ը:
«Ռուսհիդրոն» գնման գործարքն ավարտել է 2011 թվականի մարտին։ «Միջազգային էներգետիկ կորպորացիայի» բաժնետոմսերի փաթեթը, որի հիմնական ակտիվը Սևան-Հրազդան ՀԷԿ կասկադն է, «Ռուսհիդրոյի» դուստր ընկերությունը գնել է Inter RAO Holding B.V ընկերությունից։
