ԵՐԵՎԱՆ, 2 հունիսի – Sputnik. Հայաստանի հատուկ քննչական ծառայությունն (ՀՔԾ) ավարտել է ՊՊԾ գնդի գրավման փաստով հարուցված քրեական գործի ևս մի մասի նախաքննությունը։ 18 մեղադրյալների մասով գործն ուղարկվել է դատարան։ Այս մասին Sputnik Արմենիային հայտնեցին ՀՔԾ–ից։
Պաշտոնական հաղորդագրության համաձայն` կազմակերպված զինված խմբի անդամներ Տիգրան Սարգսյանը, Հովհաննես Վարդանյանը, Արամ Հակոբյանը, Վարդան Գերավետյանը, Սերգեյ Կյուրեղյանը, Գևորկ Իրիցյանը, Տիգրան Մանուկյանը, Թորոս Թորոսյանը, Արթուր Մելքոնյանը, Արթուր Սողոմոնյանը, Գառնիկ Հովակիմյանը, Արայիկ Հակոբյանը, Մարտիրոս Հակոբյանը, Արամ Մանուկյանը, Թաթուլ Թամրազյանը, Հովհաննես Հարությունյանը 2016 թվականի հուլիսի 17-ին զինված հարձակում են գործել ՀՀ ոստիկանության Երևան քաղաքի վարչության ՊՊԾ գնդի վարչական շենքերի վրա։
Հարձակումն, ըստ նախաքննական մարմնի կատրվել է «ԿՌԱԶ» մակնիշի բեռնատարով, որով գործում որպես մեղադրյալ ներգրավված անձինք կոտրել են դարպասներն ու կից պարիսպը։ Ապա «իրենց մոտ ապօրինի պահվող ինքնաձիգներով» «բռնություն գործադրելով գնդում ծառայություն իրականացնող ոստիկանության աշխատակիցների նկատմամբ՝ ներխուժել են գնդի տարածք»` պատանդ վերցնելով ու պահելով ոստիկանության աշխատակիցներին և բուժաշխատողներին:
«Կազմակերպված խումբը զավթած վարչական շենքերը, շինությունները, տրանսպորտային միջոցներն ու պատանդներին ազատելու պայմանով պետությանը ներկայացրել է բարձրաստիճան պաշտոնատար անձանց հրաժարականի, ինչպես նաև ապօրինի զենք պահելու մեղադրանքով կալանավորված Ժիրայր Սեֆիլյանին և մի շարք այլ անձանց ՀՀ արդարադատության նախարարության քրեակատարողական հիմնարկներից ազատ արձակելու վերաբերյալ պահանջներ»,– ասված է հաղորդագրության մեջ։
ՀՔԾ–ն հայտնում է նաև, որ կազմակերպված խմբի անդամներին միանալու փորձ են կատարել Վարդգես Գևորգյանն ու Մանվել Աթոյանը:
Նախաքննության ընթացքում պարզվել է նաև, որ խմբի անդամները hափշտակել են ՊՊԾ գնդի հաշվեկշռում գտնվող հրազենն ու ռազմամթերքը, իսկ գնդի պարսպի մեջ ներկառուցված «Ակբա-Կրեդիտ Ագրիկոլ Բանկ» ՓԲԸ բանկոմատից հափշտակել են 14 808 000 դրամ։
Ի դեպ, ըստ պաշտոնական վարկածի, բանկոմատից հափշտակված գումարից 300.000 –ը հայտնաբերվել է մեղադրյալ Արթուր Սողոմոնյանի կոշիկների միջից։
Մեղադրանքում տեղ են գտել նաև 2016թ. հուլիսի 24-ին խմբի անդամների կողմից ոստիկանական 4 և քաղաքացիական 1 ավտոմեքենաներ ոչնչացնելու դեպքերը։
ՊՊԾ գնդի գրավմանը մասնակցած 18 մեղադրյալների վերաբերյալ քրեական գործը մեղադրական եզրակացությամբ ուղարկվել է դատարան։
Հիշեցնենք, ՊՊԾ գունդը գրաված խումբը 2016 թվականի օգոստոսի 31-ին ինքնակամ որոշում էր կայացրել ազատել զավթած տարածքը, հրաժարվել ներկայացրած պահանջներից և հանձնվել իրավապահներին:
