ՀՀ ոստիկանությունը Հայաստանում հայտնաբերել է ռուֆինգի սիրահար երկու դեռահասի: Այս մասին Sputnik Արմենիային հայտնել է ՀՀ ոստիկանության քրեական հետախուզության գլխավոր վարչության անչափահասների իրավունքների պաշտպանության և ընտանեկան բռնության դեմ պայքարի վարչության պետ, գնդապետ Նելլի Դուրյանը:
Նրա խոսքով` ոստիկանությունը գտել է տանիքում, վտանգավոր պայմաններում նկարահանած տեսանյութերը համացանցում տեղադրած դեռահասներին, որոնք ծնողների հետ հրավիրվել են ոստիկանություն՝ բացատրական զրույցի:
«Շատ դեպքերում ծնողը չի էլ պատկերացնում, թե ինչով է իր երեխան զբաղված համացանցում»,- ասաց Նելլի Դուրյանը՝ կոչ անելով ծնողներին ու հասարակությանն առավել ուշադիր ու զգոն լինել երեխաների համացանցային վտանգավոր զբաղմունքների ու խաղերի նկատմամբ:
Հիշեցնենք` օրեր առաջ ՀՀ ոստիկանության հասարակայնության հետ կապի և լրատվության վարչության պետ Աշոտ Ահարոնյանը հայտարարել էր, որ ռուֆինգի (բառացի՝ տանիք մագլցող) սիրահար և էքստրեմալ իրավիճակները տեսագրող երիտասարդների արկածախնդրությունները լայն տարածում են ստացել սոցիալական ցանցերում:
