ԵՐԵՎԱՆ, 2 հունիսի — Sputnik. Հայաստանի մասնակցությունը «Նոր մետաքսե ճանապարհ» նախագծին կարող է ակտիվացնել հանրային դիվանագիտությունը։ Այսօր` հունիսի 2-ին, «Մետաքսե ճանապարհ» համատեքստի շրջանակում անցկացված կլոր սեղան-քննարկման ժամանակ ասաց Կոնֆուցիոսի ինստիտուտի հայկական մասի տնօրեն Գոռ Սարգսյանը։
Սարգսյանի խոսքով` աշխարհում Կոնֆուցիոսի անվան շուրջ 500 ինստիտուտ է աջակցում չինարեն լեզվի և մշակույթի տարածմանը։
««Մետաքսե ճանապարհ» նախագծի մի մասը դառնալու համար հայկական կողմը պետք է ակտիվացնի հասարակական դիվանագիտությունը, այսինքն` ավելի հաճախ խոսի Հայաստանի և հայերի մասին` չմոռանալով չինարենի և չինական մշակույթի մասին։ Այսօր մենք այդ ուղղությամբ ակտիվ քայլեր ենք ձեռնարկում, Հայաստանի կառավարությունը տարբեր նախագծեր և նախաձեռնություններ է քննարկում` տրանսպորտի, կրթության և զբոսաշրջության ոլորտում», – ասաց Սարգսյանը։
Նա ընդգծեց գործնական քայլերի անհրաժեշտությունը։ Ըստ նրա` հայկական մշակույթը պետք է ավելի հասանելի դարձնել չինացիների համար։ Այդ երկրի ներկայացուցիչները պետք է ավելի ամբողջական պատկերացումներ ունենան այն մասին, թե նրանք ինչ երկիր են այցելում, և ինչպիսի բիզնես հնարավորություններ կան այստեղ։
«Հայաստանը ենթակառուցվածքների առումով ուղիղ կապ չունի Չինաստանի հետ։ Մենք չունենք երկաթուղային և ավիահաղորդակցություն, ինչը չի կարելի ասել Վրաստանի մասին։ Այդ պատճառով էլ պետք է շեշտը դնել դիվանագիտության վրա»,- նշեց Գոռ Սարգսյանը:
Չինաստանում Կոնֆուցիոսի ինստիտուտի տնօրեն Յան Մեյխուան իր հերթին նշեց, որ չինացիներն ու հայերը շատ ընդհանրություններ ունեն, մասնավորապես ընտանիքի հարցում։
«Ես արդեն երեք տարի է` ապրում եմ Հայաստանում և հասցրել եմ նկատել, որ ընտանեկան հարաբերութունները մեր երկրներում գրեթե նույնն են։ Ամեն շաբաթ–կիրակի մենք այցելում ենք մեր ծնողներին և նրանց հետ ենք ժամանակ անցկացնում։ Ես այստեղ դասավանդում եմ և կարող եմ ասել, որ հայ երեխաները շատ խելացի են ու ակտիվ, նրանք մեծ հետաքրքրություն են դրսևորում չինական մշակույթի և չինարենի նկատմամբ», – ավելացրեց նա։
Իսկ չինարենի դասախոս Չեն Պաունը նշեց, որ քննարկվող նախագիծը շատ լավն է։
«Նախագիծը կօգնի Հայաստանի և Չինաստանի հարաբերությունների զարգացմանը», – ասաց Պաունը։
Ըստ նրա` հայ ուսանողները հիանալի ունակություններ ունեն և մեծ հետաքրքրությամբ են ուսումնասիրում Չինաստանի պատմությունն ու մշակույթը։
