ԵՐԵՎԱՆ, 1 Հունիս — Sputnik. ԱԺ փոխխոսնակ Էդուարդ Շարմազանովը երեխաների միջավայրում իրեն ավելի լավ է զգում։ Այդ մասին նա Sputnik Արմենիային հայտնեց հունիսի 1-ին ԱԺ բակում կազմակերպված մանկական միջոցառման ժամանակ։
Խորհրդարան եկած երեխաներն էլ իրենց լավ էին զգում ԱԺ փոխխոսնակի հետ լուսանկավելիս։
ԱԺ փոխխոսնակն այսօր աշխատանքի էր եկել 9-ամյա որդու ուղեկցությամբ, ավագ դուստրն արդեն 15 տարեկան է, նա տոնական արարողությանը կմիանա երեկոյան՝ սրճարանում, ընտանեկան միջավայրում։
Հարցին, թե արդյո՞ք լինում են դեպքեր, երբ Շարմազանովը ստիպված է լինում սահմանափակել զավակների իրավունքները, նա պատասխանեց.
«Առանց սհմանափակման չի կարող լինել։ Երեխան կարող է ասել` ես ունեմ հանգստի իրավունք, և այդ հանգստի իրավունքը կարող է տևել 24 ժամ։ Երեխային պետք է ասել, որ բացի իրավունքներից, ունի նաև պատասխանատվություն։ Իրավունքն ու պատասխանատվությունը զուգահեռներ են, դա պետք է մանկուց դաստիարակել»։
Աժ նախագահ Արա Բաբլոյանն էլ այսօր աշխատավայրում թոռնիկների հետ էր։ Նա ևս կարճ ժամանակ շրջեց խոհրդարանի բակում, շփվեց երեխաների հետ և հեռացավ։ Բայց մինչ այդ, հընթացս պատասխանելով լրագրողների հարցերին, ասաց, որ որպես նախկին մանկաբույժ, հաճույքով է շփվում նրանց հետ, իսկ մեծահասակների հետ աշխատանքն էլ իր դրական կողմերն ունի։
Խորհրդարան եկած երեխաներից մի քանիսը մեզ հետ զրույցում անկեղծ խոստովանեցին, որ չեն ճանաչում իրենց տոնը շնորհավորող պատգամավորներին և չգիտեն, թե ուր են բերել իրենց ծնողները։
11-ամյա Մարիամ Սարգսյանը, սակայն, ոչ միայն քաջատեղյակ էր ԱԺ–ի մասին, այլև հայտնեց, որ երազում է քաղաքական գործիչ դառնալ ու աշխատել խորհրդարանում։
«Քաղաքական գործիչներին հանդիպեցի, բայց նրանց չէի ճանաչում»,– ասաց Մարիամը,– «Նիկոլ Փաշինյանին եմ ճանաչում, ուզում էի տեսնել, բայց նա այստեղ չէ»։
ԱԺ–ի բակում կազմակերպված հունիսմեկյան միջոցառմանը, հիմնականում, ներկա էին ՀՀԿ խմբակցության ներկայացուցիչները։
