ԵՐԵՎԱՆ, 31 Մայիսի — Sputnik. Երևանի քաղաքապետարանը կառավարության դատին Երևանի կենտրոնում նոր, բացառիկ` գերակա հանրային շահ ճանաչելու նախագիծ է ներկայացրել։ Նոր իրացման գոտին ընդգրկելու է Երևան քաղաքի Աբովյան, Փավստոս Բուզանդի, Եզնիկ Կողբացու և Արամի փողոցներով պարփակված տարածքը։ Ինչպես նշված է նախագծում` այն «կառուցապատված է հին և խարխուլ, տարերայնորեն տեղակայված բնակելի տներով և շինություններով, որոնք չեն համապատասխանում հակահրդեհային, սանիտարահիգիենիկ, քաղաքաշինական նորմերին և կարող են պատճառ հանդիսանալ արտակարգ իրավիճակների»։
Տարածքը գերակա շահ էր ճանաչվել և կառուցապատման նպատակով տրամադրվել «Ի ԷՄ ՍԻ» ՓԲԸ–ին դեռ 2013թ-ին, օտարման գործընթացի վերջնաժամկետ էր սահմանվել 2017թ. մարտի 1-ը: Սակայն, 2017թ–ի մարտի 22-ին «Ի ԷՄ ՍԻ»–ն կառավարությանն ուղղված դիմումում հայտնել է, որ «տարածքում առկա մեծածավալ ինքնակամ շինությունների, ինչպես նաև գույքային միավորների նկատմամբ հավակնություններ ունեցող անձանց շրջանակի և իրավական կարգավիճակի առավել մեծ անորոշության պատճառով ընկերությունը չի կարողացել տարածքում առկա գույքային միավորների սեփականատերերի և գույքային իրավունքներ ունեցողների մի մասի հետ կնքել օտարման պայմանագրեր»:
Կառավարության նոր նախագիծը նպատակ ունի տարածքի ձեռքբերող ճանաչել «Ի ԷՄ ՍԻ» ՓԲ ընկերությանը, ինչը, ըստ նախագծի հեղինակների, թույլ կտա ավարտին հասցնել իրացման գործընթացը և քանդել այդտեղ կառուցված հին շինությունները։
Ի դեպ, Երևան քաղաքի գլխավոր հատակագծի համաձայն` նշված տարածքում նախատեսվում է իրականացնել «Հին Երևան» նախագիծը` այդտեղ տեղափոխելով ու վերականգնելով պատմության և մշակույթի քանդված հուշարձան շենքերը։
