ԵՐԵՎԱՆ, 31 մայիսի — Sputnik. Հայաստանի համար մեծ նշանակություն ունի անվտանգության ոլորտի կրթությունը, Sputnik Արմենիայի հետ հարցազրույցում ասաց ՀԱՊԿ և ԵվրԱզԷՍ ակադեմիայի ռեկտոր Մհեր Շահգելդյանը։
ՀԱՊԿ և ԵվրԱզԷՍ ակադեմիայում կազմակերպված կլոր սեղանի ընթացքում հայկական բուհերի ներկայացուցիչները առաջարկեցին համապատասխան ծրագրի մշակումների իրենց տարբերակները, նաև պատմեցին այն մասին, ինչպես են այսօր ուսանողներն ուսումնասիրում անվտանգության թեման։
Շահգելդյանի խոսքով` ուժային գերատեսչություններում, պաշտպանության ոլորտում, անվտանգության, ներքին գործերի, հետախուզության, հակահետախուզության և այսպես կոչված «փափուկ անվտանգության» ոլորտներում համալիր ուսուցում է պետք։
«Տվյալ դեպքում խոսքը դիվանագիտական, տնտեսական, տեղեկատվական և այլ տեխնոլոգիաների գործածման մասին է։ Կլոր սեղանի նպատակն է` քննարկել ընդհանուր մեթոդաբանության մշակման հնարավորությունը», — նշեց նա։
Ակադեմիայի ռեկտորի խոսքով` կարևոր է հասկանալ` հնարավոր է արդյո՞ք ուսումնական հաստատությունների «համատեղումը»։
«Գերատեսչական համակարգում, պաշտպանության ոլորտում, քաղաքացիական պաշպանության ոլորտում, ներքին անվտանգության, իրավապահ գործունեության մեջ Հայաստանում գործում են ուսումնական տարբեր հաստատություններ։ Այսօր այդ հարցը քննարկում են մասնագետները, դասախոսները, տարբեր բուհերի գիտնականները, այդ թվում` ուժային գերատեսչությունների ներկայացուցիչները», — ասաց Շահգելդյանը։
Նա նաև նշեց, որ ակադեմիա կարող են ընդունվել ավագ դպրոցի շրջանավարտները, իսկ քանի որ բուհում բակալավրիատ է գործում, դիմորդ կարող են դառնալ նաև բարձրագույն կրթություն ստացած մարդիկ։
«Միաժամանակ մենք առանձնահատուկ ուշադրություն ենք դարձնելու անվտանգության ոլորտում ուսանողների պատրաստմանը, վերապատրաստմանը և որակավորման բարձրացմանը։ Մենք կարծում ենք, որ այստեղ պետք է ընդունվեն միայն բանակում ծառայած երիտասարդները», — ասաց Շահգելդյանը։
«Անվտանգային կրթությունը և համալիր անվտանգության ապահովման խնդիրները ՀՀ-ում» թեմայով քննարկումների հարթակը լինելու է մշտապես գործող։
