ԱԺ-ի այսօրվա նիստում փոխադարձ մեղադրանքներ հնչեցին Լեռնային Ղարաբաղի խնդրի համատեքստում։ «Ելք» դաշինքի ղեկավար Նիկոլ Փաշինյանն իշխանությանը մեղադրեց արցախյան քառօրյա պատերազմում կրած կորուստների համար։ ԱԺ փոխխոսնակ Էդուարդ Շարմազանովն ընդդիմության մեղադրանքներին արձագանքեց արտահերթ ելույթով։
«Մենք ընդունում ենք, որ մենք իդեալական իշխանություն չենք։ Հայաստանում երբեք չի եղել և չի լինի իդեալական իշխանություն»,- ասաց Շարմազանովը։
«Մեր իշխանության օրոք մենք Թուրքիայի և Ադրբեջանի հետ հարաբերություններում բացի առաջընթացից այլ բան չենք ունեցել։ Գերմանիայի նման երկիրը ճանաչել է Ցեղասպանությունը, Կիպրոսի, Հունաստանի նման երկրներն ընդունել են նույնիսկ ժխտողականության մասին օրենք, ՄԽ համանախագահությունն արել է հասցեական, հակաադրբեջանական հայտարարություն»,- ասաց Շարմազանովը։
Իսկ ինչ վերաբերում է արցախյան պատերազմին, ԱԺ փոխխոսնակի խոսքով, իշխանության, հասարակության ու ընդդիմության ջանքերով հնարավոր է դարձել կանխել և ձախողել Ադրբեջանի պլանները։
«Ղարաբաղյան պատերազմում Ադրբեջանի իշխանությունն ունեցել է ֆիասկո»,- ասաց Շարմազանովը` հավելելով, որ արցախյան պատերազմից Հայաստանը քաղելու դասեր ունի։
