ԵՐԵՎԱՆ, 30 մայիսի — Sputnik. Ադրբեջանի կողմից Երևանում ԵԱՀԿ գրասենյակի փակումը գործողություն է հենց ԵԱՀԿ-ի դեմ ուղղված. այս մասին Երևանում ԵԱՀԿ գլխավոր քարտուղար Լամբերտո Զանիերի հետ համատեղ ասուլիսի ժամանակ ասաց Հայաստանի արտաքին գործերի նախարար Էդվարդ Նալբանդյանը:
«ԵԱՀԿ գրասենյակի գլխավոր քարտուղարի այցը մի ժամանակահատվածում է տեղի ունենում, երբ ԵԱՀԿ-ն փակում է իր միակ գրասենյակը մեր տարածաշրջանում, քանի որ ԵԱՀԿ մասնակից երկրներից մեկը՝ Ադրբեջանը, չարաշահելով իր իրավունքը, փաստացի արգելափակեց ԵԱՀԿ երևանյան գրասենյակի մանդատի երկարաձգումը»,- ասաց նա:
Նալբանդյանի խոսքով` Բաքուն փորձում էր իր քայլը ներկայացնել Ադրբեջան-Հայաստան հարաբերությունների հարթության վրա, սակայն իրականում դա վերաբերում է ԵԱՀԿ-Ադրբեջան հարաբերություններին:
ՀՀ արտգործնախարարը նշեց, որ ԵԱՀԿ գլխավոր քարտուղարի հետ խոսել են Ղարաբաղյան հիմնախնդրի կարգավորման գործընթացի մասին, կարևորել են Վիեննայի և Սանկտ Պետերբուրգի պայմանավորվածությունների կատարումը, որին շարունակում է խոչընդոտել Ադրբեջանը:
