ԵՐԵՎԱՆ, 30 մայիսի — Sputnik. Իսրայելցի ջազմեն, կոնտրաբաս, կոմպոզիտոր, երգիչ Ավիշայ Կոհենը իր եռյակի հետ մայիսի 31-ին համերգ կտա Արամ Խաչատրյանի անվան համերգասրահում։
Երաժշտի խոսքով` Հայաստանում վերջին անգամ նա համերգով հանդես է եկել 17 տարի առաջ։
«Ուրախ եմ կրկին այստեղ գտնվել։ Կկատարեմ հին ու նոր ստեղծագործություններ իմ երգացանկից։ Բացի այդ, համերգին մի շարք իմպրովիզներ կլինեն։ Խոստովանեմ. ինքս չգիտեմ, թե ինչ է լինելու»,- նշեց Կոհենը։
Ինչ վերաբերում է հայ ջազային երաժիշտներին, իսրայելցի հյուրը նշեց, որ ճանաչում է Տիգրան Համասյանին և հիանալի երաժիշտ համարում նրան։
«Փոքր տարիքում, նվագում էր Լոս Անջելեսի իմ շոուի ժամանակ։ Բացի այդ, ես ծանոթ եմ նաև System Of A Down ռոք խմբի արվեստին»,- ասաց ջազմենը։
Պատասխանելով հարցին, թե ի՞նչ է նրան ավելի շատ դուր գալիս` ձայնագրվել ստուդիայում թե նվագել բեմում, Կոհենն ասաց, որ երկրորդն ավելի մոտ է իրեն, քանի որ կենդանի համերգի ժամանակ այլ զգացողություններ ես ապրում։
«Երբեք երաժիշտներին ազգությամբ չեմ ընտրում, միշտ ընտրում եմ նրանց, ովքեր մոտ են ինձ հոգեպես»,- ասաց Կոհենը։
Իր նախասիրությունների մասին խոսելով՝ երաժիշտը պատասխանեց, որ սիրում է բնություն, մարդկանց և հանգստություն։
«Սիրում եմ ստեղծագործել։ Շատ կարևոր է ինձ համար տեսնել, որ մարդիկ երջանիկ են, երբ լսում են երաժշտությունս»,- նշեց նա։
Ինչպես խոստովանում է երաժիշտը, նրան գերագույն հաճույք է պատճառում դա։
