ԵՐԵՎԱՆ, 30 մայիսի-Sputnik. Կրթության գերազանցության ծրագիրը մի նպատակ ունի` Հայաստանում միջազգայնորեն մրցունակ հայալեզու հանրակրթական նոր որակ ներդնել։ Գերազանցության ազգային ծրագիրը մեկնարկել է դեռևս 2014 թվականին։ Ծրագրի հովանավորությամբ 2018 թվականի սեպտեմբերի 1-ից Արարատյան բակալավրիատի ծրագրով կտրվի մարզային և արցախյան դպրոցների «բարի երթը»։
2017 թվականին Արարատյան բակալավրիատն ավելացվեց Միացյալ թագավորության բուհական ընդունելության համակարգում, «Համալսարանների և քոլեջների ընդունելությունների ծառայություն» կազմակերպության օտարերկրյա միջազգային որակավորումների ցանցում։
Այսպիսով, մարզային դպրոցները` ուսուցիչներով ու աշակերտներով, պետք է համապատասխան քննություն հանձնեն, որպեսզի իրավունք ստանան պետական աջակցությամբ հաղորդակից դառնալ կրթական ծրագրին։
Նախագահ Սարգսյանը բարձր գնահատեց գործընթացը և նշեց` թող ոչ ոք չմտածի, թե ուսուցիչների` որոշ քննություններ հանձնելն ամոթալի է, դա պետք է ստանա մշտական բնույթ։
«Ուզում եմ առանձնապես շնորհակալություն հայտնել այն ուսուցիչներին, ովքեր առանց որևէ կոմպլեքսների եկան և ցույց տվեցին իրենց գիտելիքների բարձր մակարդակը։ Այո, հանձնեցին քննություն, այստեղ ամոթալի բան չկա, անվստահության խնդիր չկա։ Մեր պետական համակարգում ևս այդպիսի քննությունները պետք է լինեն պարտադիր և պարբերական»,-ասաց երկրի ղեկավարը։
Նա հատուկ նշեց, որ պետական դպրոց ասելով` պետք չէ նկատի ունենալ վատ դպրոց, իսկ վճարովի ասելով`միանշանակ որակյալ։
«Չափանիշներ պետք է լինեն այս ամբողջ համակարգը գնահատելու համար։ Գաղտնիք չէ, որ մեր մարզային դպրոցներն ունեն նյութատեխնիկական բազայի լուրջ խնդիր։ Մեր կրթական համակարգը միայն Երևանի վրա հիմնված չէ»,-ընդգծեց Սերժ Սարգսյանը։
Միջոցառմանը ներկա էր նաև Կրթության և գիտության նախարար Լևոն Մկրտչյանը։ «ՀՀ-ում կրթության մեջ մենք ունենք կայուն որակ, որը զարգացնելու պարագայում գերազանցության կենտրոնների միջոցով կարող ենք ունենալ միջազգային կարգի արդյունքներ։ Օրինակ` Արարատյան բակալավրիատը քեմբրիջյան համակարգի ճանաչում ստացած ծրագիր է»,-ասաց նախարարը։
Տեղեկացնենք, որ Արարատյան բակալավրիատն առաջակում է եռամյա կրթական ծրագիր։ Այն նախատեսված է ավագ դպրոցի 10-12-րդ դասարանների աշակերտների համար։
Արարատյան բակալավրիատը հնարավորություն է տալիս խորությամբ ուսումնասիրել 3 առարկա, բացի մյուս առարկաներից։
Ծրագիրը միևնույն նժարի վրա է դնում լեզուները, բնական, հասարակական գիտությունները, մաթեմատիկան, ինչպես նաև արվեստներն ու սպորտը։
Ծրագրին կարող են հայտ ներկայացնել այն դպրոցները, որոնք գտնվում են մարզերում, ունեն ավագ դպրոցի կարգավիճակ։ Դիմում ներկայացնելուց հետո Կրթության գերազանցության ազգային ծրագրի աշխատակիցները պարբերաբար այցեր կկատարեն այդ դպրոցներ։ Հավաստագիր ստանալու համար դպրոցը պետք է իրականացնի որոշակի գործողություններ` կառավարման ոլորտում բարեփոխումներ, ուսուցչական վերապատրաստումներ և այլն։
Հավաստագրման առաջին տարիներին դպրոցը ստանում է Արարատյան բակալավրիատի սկսնակ դպրոցի կարգավիճակ` պարտավորվելով հետագայում պահպանել նախորդ փուլերի ձեռքբերումները և շարունակելով բարելավել դրանք։
