ԵՐԵՎԱՆ, 29 մայիսի — Sputnik. Ավստրալիական Վիկտորիա նահանգի Մոնաշ քաղաքի քաղաքային խորհուրդը պատրաստվում է ճանաչել Հայոց ցեղասպանությունն ու ասորիների և հույների զանգվածային ոչնչացման փաստը։ Այս մասին հայտնում է ավստրալիական Neos Kosmos պարբերականը։
Նախաձեռնությամբ հանդես է եկել Մոնաշի քաղաքային խորհրդի անդամ Տեո Զոգրաֆոսը։
«Մոնաշի բնակչության թիվը 190 հազարի է հասնում, մոնաշցիներից շատերի նախնիները Հայոց ցեղասպանության և մարդկության դեմ իրագործված այլ ոճրագործությունների ականատեսն են եղել։ Եվ այդ պատճառով մեր քաղաքի բնակիչները արժանի են, որ անցած դարասկզբի իրադարձությունները պաշտոնապես ճանաչվեն», — ասել է Զոգրաֆոսը։
Նա նաև նշել է, որ Վիկտորիա նահանգը, ի տարբերություն Նոր Հարավային Ուելսի և Հարավային Ավստրալիայի, չի ճանաչել Հայոց ցեղասպանության փաստը։
