ԵՐԵՎԱՆ, 29 մայիսի — Sputnik. ՀՀ ոստիկանության մամուլի քարտուղար Աշոտ Ահարոնյանը ֆեյսբուքյան իր էջում անդրադարձել է երիտասարդության շրջանում թափ հավաքող հոբբիի նոր տեսակին`ռուֆինգին, և միաժամանակ հրապարակել է ոստիկանության պատրաստած տեսանյութը։
«Վերջերս ակտիվորեն թափ է հավաքում մի նոր, մահացու վտանգավոր հոբբի։ Ռուֆինգի (բառացի՝ տանիք մագլցող) սիրահար և էքստրեմալ իրավիճակները տեսագրող երիտասարդների արկածախնդրությունները լայն տարածում են ստացել սոցիալական ցանցերում, և ամեն օր այս մահացու հնարքների նոր հետևորդներ են ի հայտ գալիս»,- գրել է Ահարոնյանը։
Նրա խոսքով` բոլորը պետք է ուշադիր ու զգոն լինեն այդ մահաբեր երևույթի դրսևորումները կանխելու և դրա ողբերգական հետևանքները բացառելու համար։
«Համոզված եմ, որ այս հարցում մեծ դերակատարություն կարող են ունենալ զանգվածային լրատվության միջոցները»,- նշել է Ահարոնյանը։
