Երևանի թիվ 1 հիվանդանոցում բուժում ստացող արցախյան քառօրյա պատերազմի հերոսներն այսօր հյուընկալեցին հայազգի չեմպիոններին՝ ըմբշամարտի Եվրոպայի և աշխարհի չեմպիոն Արթուր Ալեքսանյանին և ծանրամարտի աշխարհի և Եվրոպայի կրկնակի չեմպիոն Նազիկ Ավդալյանին:
Հերոսներն ու չեմպիոնները միասին նշեցին Հայաստանի առաջին Հանրապետության տոնը: Զրույցի ընդհանուր թեմա շատ կա: Միմյանց հաղթանակներով հպարտանալու, միմյանց ցավով ապրելու առիթներ՝ նույնպես:
Արցախում անցյալ տարի ապրիլին մարտական գործողությունների ժամանակ ծանր վիրավորում ու հաշմանդամություն ստացած նախկին մարզիկ Ալբերտ Դալլաքյանն անթաքույց հիանում էր ըմշամարտիկ Արթուր Ալեքսանյանի սպորտային կազմվածքով: Իսկ սայլակին գամված Լաերտ Աղաբեկյանը զգուշորեն հետաքրքրվում էր արդեն նախկին ծանրամարտիկ Նազիկ Ավդալյանից՝ ստացած վնասվածքը շա՞տ է ցավում, դեռ երկա՞ր պիտի բուժվի, հնարավո՞ր է՝ մի օր կրկին սպորտ վերադառնա:
Հերոսների ու չեմպիոնների հանդիպմանը ներկա էին նաև ՀՀ ԵՊԲՀ ռեկտոր Արմեն Մուրադյանն ու ՀՀ սպորտի և երիտասարդության հարցերի նախարար Հրաչյա Ռոստոմյանը:
