ԵՐԵՎԱՆ, 28 մայիսի — Sputnik. Հայաստանի առաջին Հանրապետության օրվա կապակցությամբ Ազատության հրապարակում և Հյուսիսային պողոտայում հավաքված պատանի մարզիկներն իրենց հմտությունները ցուցադրեցին 16 մարզաձևում:
Ինչպես Sputnik Արմենիային ասաց Սպորտի և երիտասարդության հարցերի նախարարության աշխատակազմի սպորտային բարձրագույն ձեռքբերումների բաժնի ղեկավար Լյովա Վարդանյանը, միջոցառման հիմնական նպատակն առաջին պետականության ստեղծման օրը նշելն է և երիտասարդներին այնպես դաստիարակելը, որ նրանք պատրաստ լինեն պաշտպանել հայրենիքը:
«Բացի այդ, այս միջոցառումն օգնում է պատմել Հայաստանում առկա մարզաձևերի մասին և գրավել աճող սերնդի ուշադրությունը: Մեր երիտասարդներին մաղթում եմ առողջ լինել, ինչպես նաև ընտրել սեփական մարզաձևը, որպեսզի հետագայում հենց այդ մարզաձևում բարձունքների հասնեն», — ասաց Վարդանյանը:
10-ամյա Արթուրը չորս տարեկանից զբաղվում է թեյքվանդոյով և մեծ հաճույքով է մարզվում:
«Արդեն վեց տարի է՝ զբաղվում եմ թեյքվանդոյով: Պարբերաբար մասնակցում ենք տարբեր առաջնությունների», — պատմեց նա:
Վլադիմիր Ենգիբարյանի անվան բռնցքամարտի օլիմպիական մանկապատանեկան մարզադպրոցի տնօրեն Արման Հարությունյանն իր հերթին նշեց, որ նախարարությունը պարբերաբար նման միջոցառումներ է անցկացնում, օրինակ՝ մայիսի 9-ին:
«Սա շատ լավ նախաձեռնություն է, քանի որ երեխաներին կոչ ենք անում առողջ ապրելակերպ ընտրել: Կարևոր է, որ աճող սերունդը, մասնավորապես 11-15 տարեկան երեխաները իրենց ժամանակն իզուր չվատնեն: Ավելի լավ է, որ նրանք զբաղվեն սպորտով` բռնցքամարտ, ըմբշամարտ կամ մեկ այլ մարզաձևով», — ասաց Հարությունյանը:
Նա նշեց, որ հիմնական նպատակն առողջ սերունդ ունենալն է:
«Հասկանալի է, որ շատերը բարձրակարգ մարզիկներ չեն դառնա, սակայն սպորտով զբաղվելը և առողջ ապրելակերպը չափազանց կարևոր են, հատկապես մեր երկրի համար», — ավելացրեց դպրոցի տնօրենը:
Նրա խոսքով` քանի որ Հայաստանը շրջապատված է «ոչ բարեկամ» պետություններով, մեր երկրի բնակիչները պարտավոր են լինել ուժեղ և պատրաստված. վաղվա զինվորը պետք է լավ ֆիզիկական պատրաստվածություն ունենա:
Բացի այդ, Հարությունյանն ավելացրեց, որ արդեն մի քանի տարի է՝ բռնցքամարտով զբաղվում են նաև աղջիկները:
«Հայաստանում սա նոր երևույթ է, բայց նրանք բավականաչափ հաջողություններ են գրանցում այս մարզաձևում: Ինչո՞ւ ոչ», — ասաց Հարությունյանը:
Երեխաները մեծ ուրախությամբ մասնակցեցին բաց երկնքի տակ անցկացվող միջացառմանը` ցուցադրելով իրենց սպորտային հմտությունները:
