ԵՐԵՎԱՆ, 28 մայիսի — Sputnik. Անհրաժեշտ է նոր քաղաքական ուժ ձևավորել, որի մեջ կմտնեն ոչ միայն «ՕՐՕ» նախընտրական ընդդիմադիր դաշինքի նախկին անդամները, այլև՝ նոր ուժեր: Այսօր լրագրողների հետ զրույցում ասաց «Ժառանգություն» կուսակցության ղեկավար Րաֆֆի Հովհաննիսյանը:
«Օհանյան-Րաֆֆի-Օսկանյան» դաշինքը ստեղծվել էր 2017 թվականի խորհրդարանական ընտրությունների նախաշեմին պաշտպանության նախկին նախարար Սեյրան Օհանյանի, արտաքին գործերի նախկին նախարարներ Վարդան Օսկանյանի և Րաֆֆի Հովհաննիսյանի կողմից: Վերջին ժամանակները մամուլում տեղեկատվություն է հայտնվել դաշինքի փաստացի փլուզման մասին:
«ՕՐՕ հապավումը հոգեհարազատ չեմ համարում, դա նախընտրական դաշինք էր, որտեղ կային գեներալ Օհանյանի, նախկին նախարար Օսկանյանի և մեծն գրող Րաֆֆիի անունների առաջին տառերը, դա նախընտրական դաշինք էր, հիմա՝ իրականության մեջ անհրաժեշտ է, որպեսզի նոր ուժ ստեղծվի՝ տարբեր ուժերի միացման եղանակով, ոչ միայն որպես ձև, այլ որպես բովանադակություն՝ ավելի լայն և ավելի խորը», — ասաց Հովհաննիսյանը:
Նրա խոսքով` մեկ ամսից կանցկացվի «Ժառանգության» համագումարը, որը ցույց կտա, թե ինչ ճանապարհով են գնալու նրա անդամները:
Ընդ որում, Հովհաննիսյանի խոսքով, կարևոր չէ՝ կմնա՞ արդյոք «Ժառանգություն» անվանումը այլ ուժերի հետ միավորվելու դեպքում, թե ոճ, կարևորը շարժման էությունն է:
Լրագրողների այն հարցին, թե չի պատրաստվու՞մ լքել Հայաստանը, Հովհաննիսյանը ծիծաղեց և ասաց՝ «ինչպես տեսնում եք, ես այստեղ եմ»:
Ազգային ժողովի հերթական ընտրություններն անցկացվեցին ապրիլի 2-ին։ Ընտրության արդյուքներով վեցերորդ գումարման ԱԺ անցավ 4 քաղաքական ուժ` Հայաստանի Հանրապետական կուսակցությունը, «Ծառուկյան», «Ելք», «Օհանյան-Րաֆֆի-Օսկանյան» դաշինքներն ու «Հայ Յեղափոխական Դաշնակցությունը»:
