ԵՐԵՎԱՆ, 26 մայիսի — Sputnik, Արմենուհի Մխոյան. Արտագնա աշխատանքի մեկնած Համլետը նշում է. «Հոգով Լանջիկում եմ, մարմնով՝ Ռուսաստանում։ Ծննդավայրիս կարոտը փարատելու համար գյուղի փողոցներից մեկը «Լանջիկ» եմ կոչել»։
Նա ցույց տվեց բջջայինում եղած քարտեզի հավելվածը՝ «Լանջիկ» փողոցն ու այդ փողոցում իր տան լուսանկարը՝ մեծ ցուցանակով:
«Այդ գյուղում ինձ հարգում են, խնդրեցի, որ այդ փողոցը «Լանջիկ» կոչեն՝ համաձայնեցին, համապատասխան ստորագրություն հավաքվեց, Մոսկվայի հետ համաձայնեցվեց»,- ասաց նա։
Գործարարի խոսքով՝ այդ գյուղում ընդամենը 4 հայ ընտանիք է բնակվում, սակայն մյուս բնակիչները ևս մեծ սիրով համաձայնել են փողոցն անվանակոչել «Լանջիկ»։
«Այնտեղ կան մարդիկ, որոնք օգնության կարիք ունեն, ես էլ նրանց եմ օգնում»,- ասաց Համլետ Հովհաննիսյանը։
Համլետը նաև նշեց, որ թեև ինքն աշխատում է ՌԴ-ում, ընտանիքը՝ կինը, 3 որդիներն ու ծնողները, շարունակում են ապրել Հայաստանում: Ըստ նրա՝ այդպես դժվար է, բայց երեխաները պետք է Հայաստանում մեծանան:
«Գործը թող մնա Ռուսաստանում, ընտանիքը՝ Հայաստանում: Երեխաները պետք է հայկական դաստիարակություն ստանան»,-նշեց գործարարը:
Համագյուղացիները վստահեցնում են՝ Համլետը հարազատ ծննդավայրը չի մոռանում և ցանկացած հարցով օգնում է՝ լուսավորության, դպրոցի կամ եկեղեցու վերականգնման և այլն:
