ԵՐԵՎԱՆ, 26 մայիսի – Sputnik. ՀՀ քննչական կոմիտեն հայտնում է, որ Արաբկիր վարչական շրջանի քննչական բաժնում քննություն է տարվում՝ պարզելու երեկ` մայիսի 25-ին, Դավթաշենի կամրջից ընկած 13-ամյա երեխայի մահվան պատճառները։
Մայիսի 25-ին, ժամը 19:25-ին Քննչական կոմիտեն հաղորդում էր ստացել այն մասին, որ Դավթաշենի կամրջից երեխա է ընկել: Դեպքի վայր մեկնած քննչական-օպերատիվ խումբը դիակի վրա բռնության հետքեր չէր հայտնաբերել:
ՔԿ նախնական տվյալներով՝ 13-ամյա երեխան նույն օրը՝ ժամը 18:30-ի սահմաններում, կամրջի երկաթյա արգելափակոցների վրայով քայլելիս հանկարծակի վայր է ընկել և մահացել:
Երեխայի մահվան բոլոր հանգամանքները պարզելու համար նշանակվել է դատաբժշկական փորձաքննություն:
Մինչ այդ մամուլում արդեն իսկ որոշ մանրամասներ են հրապարակվել, որոնց համաձայն, երեխան զբաղվելիս է եղել ինչ-որ սպորտաձևով և ընկերոջ հետ կամրջի մոտ խաղալիս, փորձել է երկաթյա արգելափակոցների վրա նրան ինչ-որ հնարքներ ցուցադրել:
