ԵՐԵՎԱՆ, 26 մայիսի — Sputnik. Մի քանի տասնյակ հազար փախստական Բուրունդիից երախտագիտությունն է հայտնում Հայաստանին և «Ավրորա» միջազգային մարդասիրական մրցանակի ստեղծողներին, Հայաստանի Ամերիկյան համալսարանում այս տարվա հավակնորդների հետ կազմակերպած հանդիպմանն ասաց մրցանակի առաջին դափնեկիր Մարգարիտ Բարանկիցեն։
«Ավրորան» «դրախտ» է ստեղծում։ Դուք ստեղծել եք երախտիքի և արժանապատվության մթնոլորտ։ Երբ ես երեխաներին պատմում եմ 60-հազարանոց ճամբարի նվերի մասին, նրանք ուրախանում են, պարում և հարցնում, թե ո՞րտեղ է գտնվում Հայաստանը, և ինչու՞ է նա ցանկանում կիսել մեր տառապանքները»,- պատմեց Մարգարիտ Բարանկիցեն` դիմելով Ռուբեն Վարդանյանին և «Ավրորայի» մյուս հիմնադիրներին։
Նա նշեց, որ մրցանակը դարձավ «սեր, կարեկցանք, արժանապատվություն և հույս», որը նրանք ստացան։ Փոխվեց բուրունդցի փախստականների կյանքը։
Բարանկիցեի խոսքով` երիտասարդները, որոնք համալսարաններ են վերադառնում, կանայք, որոնք մրցանակի շնորհիվ կարող են կերակրել երեխաներին և նրանց դպրոց ուղարկել, Մարգարիտի միջոցով փոխանցում են իրենց անսահման երախտագիտությունը։
«Շնորհակալություն հայ ժողովրդին, որի ցեղասպանության մասին այսօր կարդում է Բուրունդիի երիտասարդությունը»,- ասաց Բարանկիցեն։
Բուրունդիում իրավիճակը սրվել է 2015 թվականի գարնանը, երբ նախագահ Պիեռ Նկուրունզիզան հայտարարեց, որ պայքարելու է երրորդ անգամ վերընտրվելու համար։ Ընտրություններում իր հաղթանակից հետո՝ հուլիսին, երկրում մի շարք քաղաքական սպանություններ տեղի ունեցան։ ՄԱԿ-ի տվայլներով` 2015 թվականի ապրիլից, ընդհանուր առմամբ, մահացավ ավելի քան 200 մարդ։ Մտավախություններ առաջացան, որ 10 տարի անց թութսիների և հութուների միջև արյունալի քաղաքացիական պատերազմի ավարտից հետո Բուրունդիում սպանվել էր մոտ 300 հազար մարդ, երկիրը կրկին կարող է բռնության զոհ դառնալ։
2015 թվականի ապրիլին Բուրունդիից փախուստի է դիմել 410 հազար մարդ։ Նրանց մեծ մասը ժամանել է Տանզանիա։ Այդ երկրում երեք գերհագեցած ճամբարներում ապաստան է գտել 249 հազար բուրունդիացի։ Բուրունդիայից 84 հազար փախստական ապաստան գտան Ռուանդայում, 45 հազարը` Ուգանդայում և ավելի քան 40 հազարը` Կոնգոյի Ժողովրդավարական հանրապետությունում։
Բուրունդիի «Խաղաղության Տան» հիմնադիր Մարգարիտ Բարանկիցեն 2016 թվականի ապրիլի 24-ին կազմակերպած AuroraPrize մրցանակի առաջին դափնեկիրը դարձավ։
«Ավրորա» մարդասիրական նախաձեռնությունը, որը ստեղծվել է Հայոց ցեղասպանության ականատեսների անունից՝ ի երախտագիտություն նրանց փրկողների, ձգտում է հնարավորություն տալ մերօրյա հերոսներին՝ կյանք և հույս պարգևել նրանց, ովքեր մարդասիրական աջակցության խիստ կարիք ունեն, այդպիսով, շարունակել մարդասիրության շղթան աշխարհով մեկ:
«Ավրորա» մարդասիրական նախաձեռնությունը գործով արտահայտված երախտագիտություն է: Այն նպատակ ունի ութ տարի շարունակ (2015-2023թթ.՝ ի հիշատակ ութ տարի տևած Հայոց ցեղասպանության՝1915-1923 թթ.) աջակցել մարդկանց, որոնք, վտանգելով իրենց կյանքը, կնպաստեն այնպիսի նախագծերի իրագործմանը, որոնք կբարելավեն առավել կարիքավոր և աղքատ մարդկանց կենցաղը:
