ԵՐԵՎԱՆ, 25 մայիսի — Sputnik. Քաղաքագետ Սուրեն Սարգսյանը ֆեյսբուքյան իր էջում տարակուսանքով նշել է` այնպիսի տպավորություն է, թե Թուրքիայի նախագահ Ռեջեփ Թայիփ Էրդողանն ինչ էլ անի, անպատիժ է մնում:
«Ստացվում է, որ Էրդողանն աշխարհի միակ տղեն է, որը կարող է Վաշինգտոնում ԱՄՆ քաղաքացիներ ծեծել ու անպատիժ մնալ։ Զորք մտցնել այլ պետություն՝ Իրաք, Սիրիա, տեղում քրդերի ու եզդիների ցեղասպանություն կազմակերպել և անպատիժ մնալ։ Սիրիան դարձնել արյան ծով ու անպատիժ մնալ։ Իսլամական պետության հետ նավթի առևտուր անել ու անպատիժ մնալ։ Փողեր լվանալ որդու միջոցով ու անպատիժ մնալ։ Ռուսական ինքնաթիռ խփել ու մեծ հաշվով մարսել։ Թուրքիան վերածել սուլթանության և հաջողել։ Ստալինյան ռեպրեսիաների ենթարկել սեփական զինվորականությանը, մտավորականությանը, լրագրողներին,
ակտիվիստներին ու անպատիժ մնալ։ Իսրայելի գլխին ինչ օյին ասես խաղալ ու անպատիժ մնալ։ Փակել Facebook և Twitter սոցիալական ցանցերը և արդարացվել։ Ամերիկյան հոգևորականին ազատազրկել և մարսել։ ՄԱԿ-ի բանաձևերի վրա թքած ունենալ։ Միջազգային հանրության վրա թքած ունենալ։ Ամերիկյան զինվորներին Ստամբուլում ծեծել ու անպատիժ մնալ՚,- գրում է քաղաքագետը:
Սուրեն Սուրենյանն ընթերցողներին առաջարկում է մի պահ պատկերացնել, որ նման վարքագիծ դրսևորեին ասենք Ռուսաստանը, Չինաստանը, Իրանը:
«Ինչ համամարդկային-համաշխարհային-համաեվրատլանտյան հիստերիայի ականատես կլինեինք»,- եզրակացնում է նա:
Բայց քանի որ խոսքն այս դեպքում ոչ թե այլոց, այլ, նրա ձևակերպմամբ ՙԹուրքիո Սուլթանի՚ մասին է, ապա նրան կարելի է, նրան պատժող չկա։
