ԵՐԵՎԱՆ, 25 մայիսի — Sputnik. Լեռնային Ղարաբաղի հակամարտության գոտում ստատուս քվոյի պահպանումն անընդունելի է, սակայն հակամարտությունը ռազմական լուծում չունի և պետք է կարգավորվի խաղաղ բանակցությունների միջոցով: Այս մասին հայտարարել է Եվրոպական Խորհրդարանի արտաքին հարաբերությունների հանձնաժողովի նախագահ Դեյվիդ Մքալիստերը:
«Եվրոպական բոլոր կառույցները միակարծիք են՝ Լեռնային Ղարաբաղում ստատուս քվոյի պահպանումն անընդունելի է, սակայն այս հակամարտությունը ռազմական լուծում չունի: Վաղաժամ քաղաքական հանգուցալուծում է պետք՝ միջազգային նորմերին համաձայն: Եվրոպական Միությունը շարունակում է լիովին սատարել ԵԱՀԿ Մինսկի խմբի համանախագահների միջնորդական ջանքերին, որոնցից մեկը Եվրոպական Միության անդամ Ֆրանսիան է»,- ասել է Մքալիստերը լրագրողների հետ հանդիպման ժամանակ:
Նրա խոսքով` հակամարտող կողմերը պետք է հարգեն հրադադարը պահպանելու և հակամարտությունը խաղաղ ճանապարհով կարգավորելու իրենց հանձնառությունը:
«Մեզ մտահոգում է շարունակվող սպառազինությունների մրցավազքը, ռազմական հռետորաբանությունը և կրկնվող միջադեպերը շփման գծում, որոնք երկու կողմերից էլ կյանքեր է խլում: ԵՄ-ն կողմերին քաջալերում է սկսել բանակցությունները առանց նախապայմանների՝ ԵԱՀԿ Մինսկի խմբի համանախագահների կոչերին համապատասխան»,- ասել է Մքալիստերը:
