ԵՐԵՎԱՆ, 25 մայիսի — Sputnik. «Ռոսատոմ» պետական կորպորացիան, Երևանում Գիտության և մշակույթի ռուսական կենտրոնն ու Հայաստանի պետական ճարտարագիտական համալսարանը ներկայացրին Հայաստանի ավագ դպրոցի աշակերտների համար նախատեսված օլիմպիադայի մանրամասները։
Միջոցառմանը ներկա էին երկրի առաջատար ֆիզիկամաթեմատիկական դպրոցների աշակերտները։
Երևանում Գիտության և մշակույթի ռուսական կենտրոնի տնօրեն Մարկ Կալինինը լրագրողներին հայտնեց, որ ամեն տարի հայ դիմորդների համար մոտավորապես 200 տեղ է հատկացվում ռուսական բուհերում։ 2017 թվականին Ռուսաստանից Հայաստան են ժամանել ավելի քան 20 բուհի ներկայացուցիչներ, որոնց թվում էին նաև Մոսկվայի ինժեներաֆիզիկական ինստիտուտի (ՄԻՖԻ) ներկայացուցիչները։
«Մենք տեխնիկական մասնագիտությունների պահանջարկի կայուն աճ ենք տեսնում։ Այս տարի մի քանիսն ընդունվեցին ՄԻՖԻ-ի բակալավրիատ։ Պայմանավորվածություն կա, որ ամեն տարի ՄԻՖԻ-ն 5 տեղ է հատկացնելու այն դպրոցականների համար, որոնք լավ գնահատականներ կունենան մաթեմատիկայից և ճշգրիտ գիտություններից», — ասաց Կալինինը։
Նրա խոսքով` այս հարցում հետաքրքրություն է դրսևորում նաև «Ռոսատոմ» պետական կորպորացիան։
«Անհրաժեշտություն է առաջանում պահուստային բարձրորակ մասնագետներ պատրաստել ատոմակայանի, սպասարկող ընկերությունների համար, որոնք գործունեությունն են ծավալում Հայաստանում», — ասաց Կալինինը։
Նա նշեց, որ Հայաստանն ավանդաբար առանձնանում է ֆիզիկայի և մաթեմատիկայի պատրաստվածության բարձր մակարդակով։
ՄԻՖԻ-ի ներկայացուցիչ Կիրիլ Կուցենկոյի խոսքով` անցած տարի Հայաստանի 31 մասնակիցներից 6-ն Օլիմպիադայի մրցանակակիր են դարձել, նրանցից հինգն ընդունվել են ՄԻՖԻ։
«Շատ մեծ ցուցանիշ է։ Համեմատության համար ասեմ, որ Ռուսաստանից և այլ երկրներում մասնակցել է 19 հազար մարդ, 900 մրցանակակիր է եղել, իսկ Հայաստանում 31-ից 6-ն է մրցանակ ստացել», — ասաց Կուցենկոն։
Նա նշեց, որ Օլիմպիադայի նպատակն է բացահայտել ամենաընդունակ, ամենատաղանդավոր և ամենանպատակասլաց երեխաներին, որոնք հետագայում կաշխատեն ատոմային ոլորտում հօգուտ պետությանը։
«Ռուսատոմ Սերվիս» բաժնետիրական ընկերության («Ռուսատոմ» պետական բաժնետիրության կազմում է) տեխնիկական տնօրեն Վասիլի Կուզմինն իր հերթին նշեց, որ մասնագիտական օլիմպիադան ևս մեկ նշաձող է Հայաստանի և Ռուսաստանի ատոմային արդյունաբերության ոլորտի կադրերի պատրաստման համագործակցության հարցում։
«Մեծամորի ՀԷԿ-ի արդիականացման նախագիծը, որի վրա աշխատում ենք հայ մասնագետների հետ էներգետիկայի զարգացման նոր ռազմավարական ուղղության շրջանակում, բարդ խնդիր է, որը համատեղ աշխատանք և, իհարկե, կրթության բարձր մակարդակ է պահանջում», — նշեց Կուզմինը։
Օլիմպիադան կանցկացվի երկու փուլով` 2019-ի աշնանն ու 2017-ի ձմռանը։ Հաղթողներն ու մրցանակակիրները 2018 թվականին արտոնություններ կստանան «Ռոսատոմ» պետական բաժնետիրության հենակետային բուհեր ընդունվելիս (մասնավորապես ՄԻՖԻ)։
«Ռոսատոմ» ատոմային էներգետիկայի պետական կորպորացիան միավորում է ավելի քան 350 ձեռնարկություն և գիտական հիմնարկ, այդ թվում` Ռուսաստանի ատոմային ոլորտի բոլոր քաղաքացիական ընկերություններն ու գիտահետազոտական կենտրոնները։
