ԵՐԵՎԱՆ, 25 մայիսի — Sputnik. Կրթության և գիտության նախարարի պաշտոնակատար Լևոն Մկրտչյանը ճիշտ է համարում դպրոցների օպտիմալացման ծրագիրը, քանի որ, նրա դիտարկմամբ, կան դպրոցներ, որոնք իրարից մի քանի հարյուր մետր հեռավորության վրա են և միաժամանակ թերբեռնված։
«Այս պահին 3-4 ավագ դպրոց կա Երևան քաղաքում, որոնք ենթակա են օպտիմալացման»,- ասաց նախարարի պաշտոնակատարը։
Մկրտչյանի ղեկավարած նախարարությունը շարունակում է մտածել նաև ուսուցիչների աշխատավարձի մասին։
«Ուզում ենք ուսուցիչների բազային աշխատավարձի բանաձև սահմանել»,-ասաց նա` նշելով, որ այսօր նույն դրույքով աշխատող ուսուցիչները տարբեր աշխատավարձեր են ստանում` կախված աշակերտների քանակից։
Մկրտչյանը խոսեց նաև դպրոցներում կազմակերպվող դրամահավաքների ու դրանց անվերահսկելիության մասին։ Նա հստակ շեշտեց` եթե ծնողները բողոքեն, որ դպրոցում դրամահավաք է անցկացվում, նույն վայրկյանին տնօրենը կհեռացվի աշխատանքից։ Բայց խնդիրն այն է, որ նույն այդ ծնողները դպրոցից դուրս «Վերջին զանգի» կամ այլ միջոցառումների համար գումար են հավաքում։
Որպես լավագույն օրինակ Լևոն Մկրտչյանը մեջբերեց «Մխիթար Սեբաստացի» կրթահամալիրի փորձը։
«Այնտեղ տարեկան հստակ գումար են վերցնում։ Արդյունքում և՛ ծնողներն են գոհ, և՛ երեխաները։ Նրանք գիտեն, թե որտեղ և ինչպես են ծախսվում գումարները»,-ասաց նախարարի պաշտոնակատարը։
Նա հիշեց, որ խորհրդային տարիներին, երբ ինքը ևս աշակերտ էր, դպրոցներում դրամահավաք անցկացվում էր, բայց ժամանակներն այլ էին։ Հիմա սոցիալական անհավասարությունն ուրիշ պահանջներ է թելադրում։
