Նոր չվերթ. Պրահան ավելի հասանելի կդառնա ՀՀ քաղաքացիների համար

ԵՐԵՎԱՆ, մայիսի 25 — Sputnik, Լաուրա Սարգսյան. Երևան — Պրահա — Երևան առաջին չվերթը կիրականացվի հունիսի 13-ին։ Պրահան ավիաընկերության մեկնարկած վեցերորդ ուղղությունը կդառնա։

««Armenia» ավիաընկերության ինքնաթիռները Պրահա կթռչեն շաբաթական երկու անգամ` երեքշաբթի և ուրբաթ օրերին։ Չվերթի տևողությունը 3 ժամ 45 րոպե է», — Sputnik Արմենիայի թղթակցի հետ զրույցում ասաց «Armenia» ավիաընկերության փոխտնօրեն Գևորգ Խաչատրյանը։

Նրա խոսքով` տոմսերն արդեն վաճառքում են։ Դրանք կարելի է ձեռք բերել ավիաընկերության պաշտոնական կայքում։

«Armenia»-ն կանոնավոր չվերթեր է իրականացնում դեպի Բեյրութ, Մինվոդի, Վորոնեժ, նաև չարտերային չվերթեր է իրականացնում տարբեր ուղղություններով։

«Armenia» ավիաընկերությունն ունի երկու ինքնաթիռ` Boeing 737-500 և Boeing 737-700։ Անձնակազմում կա 53 աշխատակից։ Ավիաընկերության հիմնադիրներն են Աշոտ Թորոսյանը (51 տոկոս բաժնետոմս), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս):

Հայաստանն ազգային ավիափոխադրողից զրկվել է 2013 թվականին` «Արմավիա» ընկերության սնանկացումից հետո: Այնուհետև ավիաշուկայում հայտնվել է AirArmenia ավիաընկերությունը, որն էլ 2014 թվականի հոկտեմբերին, հայտնվելով սնանկացման եզրին, դադարեցրել է թռիչքները։