ԵՐԵՎԱՆ, 24 մայիսի — Sputnik. «Շիրակի» հաղթանակը ապահովեցին Կիրան Նվաբուեզեյի դուբլը և Վահան Բիչախչյանի խփած գնդակը:
Գավաթային հանդիպումները միշտ էլ տարբերվում են առաջնության խաղերից իրենց ընթացքով, մոտեցմամբ ու հոգեբանությամբ: Իսկ եզրափակիչում մրցակից կողմերը շատ լավ հասկանում են, որ սայթաքելու իրավունք չունեն:
Այս խաղարկության եզրափակիչը մյուսներից մի փոքր տարբերվում էր իր նշանակությամբ: Բանն այն է, որ անկախ հանդիպման արդյունքից և՛ «Շիրակը», և՛ «Փյունիկը» արդեն ապահովել էին Եվրոպայի լիգայի ուղեգիրը: Հետևաբար, ավելորդ ճնշում թիմերի ֆուտբոլիստների վրա չկար: Բայց պարզ էր, որ երկու կողմերն էլ ամեն ինչ անելու էին պատվավոր ավարին տիրանալու համար: Բացի դա, թիմերը եզրափակչում հանդիպում էին երկրորդ անգամ: 2013 թվականին «Փյունիկը» հաղթել էր 1:0 հաշվով:
Եզրափակիչը խոստումնալից մեկնարկ ունեցավ գյումրեցիների համար: Խաղի 6-րդ րոպեին Ռումյան Հովսեփյանը փոխանցում կատարեց դեպի «Փյունիկի» տուգանային հրապարակ, որի մատույցներում, փորձելով հասնել գնդակին, սայթաքեց։ Կիրան Նվաբուեզեն, մնալով մեն մենակ դարպասապահի դիմաց, բացեց խաղի հաշիվը:
Իհարկե, խփած գնդակը ոգևորեց «Շիրակին», և դա հակառակ իմաստով անդրադարձավ նաև «Փյունիկի» ֆուտբոլիստների վրա: Փորձելով արագ հետ բերել կորցրածը` «Փյունիկը» ուղիներ էր փնտրում դեպի մրցակցի դարպասը, բայց Վարդան Բիչախչյանի թիմը շատ հստակ էր գործում պաշտպանությունում և ևս մեկ անգամ կարողացավ խորքից կատարված փոխանցումով նոր հաջողության հասնել:
Աղվան Դավոյանը սեփական կիսադաշտից նկատեց Վարդան Բիչախչյանի առաջխաղացումն ու գնդակն ուղարկեց դեպի խաղընկերը: «Շիրակի» երիտասարդ ֆուտբոլիստն, արագորեն ներխուժելով տուգանային հրապարակ, դիպուկ հարվածով կրկնապատկեց «Շիրակի» առավելությունը: Խաղի ավարտին դեռևս մեկ ժամից ավելի ժամանակ կար, բայց հյուրերը երկու գնդակի առավելություն ունեին:
Բայց «Շիրակը» այսքանով չբավարարվեց: Ընդմիջման գնալուց յոթ րոպե առաջ գյումրեցիները հաղթում էին արդեն խոշոր հաշվով ու լուրջ հայտ ներկայացնում եզրափակչում հաղթելու համար: Տուգանայինից Ղուկաս Պողոսյանի հուժկու հարվածից հետո գնդակը հետ մղվեց, առաջինը վրա հասավ Կիրան Նվաբուեզեն` ձևակերպելով դուբլ այս խաղում:
Երկրորդ խաղակեսում «Շիրակն», արդեն մեծ ուժեր կենտրոնացնելով պաշտպանությունում, հիմնականում հակագրոհներ էր ձեռնարկում: Բայց նկատելի էր, որ գյումրեցիների իրական նպատակը ընդմիջումից հետո արդեն սեփական դարպասն անառիկ պահելն էր, ինչ էլ հաջողվեց:
Այսպիսով` հաղթելով 3:0 հաշվով «Շիրակն» իր պատմության մեջ երկրորդ անգամ նվաճեց Հայաստանի գավաթը:
