Sputnik Արմենիայի հետ զրույցում Մանչեսթերում բնակվող ազգությամբ հայ Լիանա Հարությունյանը պատմում է այսօր այնտեղ տիրող իրավիճակի ու մարդկանց տրամադրվածության մասին։
«Իրավիճակն այստեղ սարսափելի է, ամեն պահի որևէ վատ բանի ես սպասում։ Մեծ Բրիտանիայի վարչապետ Թերեզա Մեյն ասաց, որ երկրորդ ահաբեկչությունն է սպասվում։ Նա կոչ է անում չափազանց զգոն լինել։ Նրա խոսքով` հարձակումն, ամենայն հավանականությամբ, տեղի կունենա տրանսպորտային միջոցներում, մասնավորապես, գնացքներում կամ ինքնաթիռներում։ Ոստիկանությունը շուրջօրյա հսկողություն է իրականացնում, շուրջ հազար զինվորական ստուգում է կասկածելի անձանց… Իրավիճակն անտանելի է։ Ծնողները կորցրել են իրենց երեխաներին»,-վախեցած ձայնով պատմում է հայուհին։
Նա պատմել է, որ մի տղամարդ համերգի տոմսը նվեր է արել դստերը, բայց արդյունքում կորցրել նրան։
Լիանայի խոսքով` ամենավատն այն է, որ չգիտեն, թե որ կողմից հարվածի սպասել։ Վախենում են դուրս գալ, աշխատանքի գնալ։
