ԵՐԵՎԱՆ, 23 մայիսի – Sputnik. Փարիզի Էյֆելյան աշտարակի լույսերը այսօր կեսգիշերին կմարվեն` ի հիշատակ «Մանչեսթեր Արենա» մարզահամերգային համալիրում տեղի ունեցած ահաբեկչության զոհերի: Ինչպես հայտնում է leparisien-ը, այս մասին տեղեկացրել է Փարիզի քաղաքապետ Ան Իդալգոն:
«Մանչեսթերը գրոհելով` ահաբեկիչները ցանկացել են գրոհել այն համամարդկային արժեքները, որոնց կրողը նաև մենք ենք` ժողովրդավարություն, ազատություն, մարդասիրություն և խաղաղ գոյակցություն»,- ասել է Իդալգոն։
Նշենք, որ երեկ` մայիսի 22-ին, անգլիական Մանչեսթեր քաղաքի մարզահամերգային համալիրում, որտեղ տեղի էր ունենում ամերիկացի երգչուհի Արիանա Գրանդեի համերգը, հզոր պայթյուն է որոտացել՝ խլելով 22 մարդու կյանք: Նշվում է, որ դա Բրիտանիայում վերջին 12 տարում տեղի ունեցած խոշորագույն ահաբեկչությունն էր:
