ԵՐԵՎԱՆ, 23 մայիսի — Sputnik. Ցանկացած պետության ներկայացուցչի նշանակումը միջազգային կազմակերպության գլխավոր քարտուղարի պաշտոնում բարձրացնում է այդ պետության դերն ու նշանակությունը կազմակերպության մեջ։ Այս համոզմունքն ունի ՀՀ ՊՆ պաշտպանական քաղաքականության վարչության պետ Լևոն Այվազյանը։ Ու այս հանգամանքը բոլորովին չի նշանակում, թե Խաչատուրովը, ՀԱՊԿ գլխավոր քարտուղարի պաշտոնը ստանձնելով, պետք է օգտագործի ռեսուրսն ու առաջ տանի իր երկրի շահերը։
«ՀԱՊԿ գլխավոր քարտուղարի պաշտոնը միջազգային պաշտոն է։ ՀԱՊԿ գլխավոր քարտուղարն առաջին հերթին պետք է ՀԱՊԿ համընդհանուր շահերը, հետաքրքրություններն ու խնդիրներն առաջ տանի։ Դա մոտավորապես նույն հարցն է, եթե ՆԱՏՕ-ի գլխավոր քարտուղարը հանդես է գա Նորվեգիայի շահերի պաշտպանությունից, դա այդպես չէ»,-ասաց նա։
Այվազյանը նշեց, որ մեր ազգային շահերը ՀԱՊԿ շրջանակում պետք է ամփոփի ՀԱՊԿ-ում միջազգային վարկի ու հեղինակության բարձրացման խնդիրը։ Իսկ դա կարող է լինել հետևյալ ձևաչափում։
«Պետք է կատարելագործվի ռազմական կառավարման համակարգը, ռազմական բաղադրիչը դառնա գործուն, այն պարտավորությունները, որ կան, դրանց կիրառման գործուն մեխանիզմներ լինեն»,-ասաց Լևոն Այվազյանը։
Նա հիշեցրեց, որ վերջին տարիներին դրական փոփոխություններ են կատարվել, որ այդ մեխանիզմները դառնան գործուն։
Հավաքական անվտանգության խորհրդի որոշման համաձայն` Խաչատուրովը ՀԱՊԿ գլխավոր քարտուղար է նշանակվել 2017 թվականի ապրիլի 14-ին։ Նա պաշտոնը պաշտոնապես ստանձնել է մայիսի 2-ին։
ՀԱՊԿ-ն, որի կազմում են Հայաստանը, Բելառուսը, Ղազախստանը, Ղրղըզստանը, Ռուսաստանը, Տաջիկստանը, հիմնադրվել է 2002 թվականի մայիսի 14-ին։ 2006 թվականին կազմակերպության անդամ է դարձել Ուզբեկստանը, սակայն 2012 թվականին կասեցրել է իր անդամակցությունը։
