ԵՐԵՎԱՆ, 21 մայիսի — Sputnik. Սինգապուրում Գրիգոր Լուսավորիչ հայկական եկեղեցին, որը կառուցվել է 1835 թվականին իռլանդացի ճարտարապետ Ջորջ Կոլմանի նախագծով, զբոսաշրջիկների ամենասիրված տեսարժան վայրերից է։ Այնտեղ ամեն օր այցելում է ավելի քան 100 մարդ, հայտնում է Աինգապուրի Straits Times պարբերականը։
Շարունակելով խոսել Սինգապուրի հայերից և հայկական եկեղեցուց՝ Straits Times-ը հայտնում է, որ անցած հարյուրամյակի 70-ական թվականներին Սինգապուրի հայտնի հայերի շիրմաքարերը Բուկիտ Տիմահ գերեզմանոցից տեղափոխվել են եկեղեցու տարածք, որի հարևանությամբ պանթեոն է հիմնվել։ Եկեղեցին և կից տարածքը ներառվել է Սինգապուրի պատմական հուշարձանների ցանկում։
Այժմ Գրիգոր Լուսավորիչ եկեղեցին վանահայր չունի։ Տարին մեկ անգամ այստեղ ժամերգություն է անցկացնում տեր Զավենը, որը Սինգապուր է գալիս Մյանմայից։
Սինգապուրում, որտեղ այժմ մոտ 100 հայ է ապրում, նաև գործում է Հայկական ժառանգության անսամբլ, որով հետաքրքրված են ոչ միայն հայերը, այլև սինգապուրցիները, նշում է պարբեկականը։
