ԵՐԵՎԱՆ, 18 մայիսի — Sputnik, Անի Լիպարիտյան. Հայտնի լացող ուռենին հայ մեծ բանաստեղծ Պարույր Սևակը տնկել է հայրական տան բակում` «Զանգակատուն» գյուղում, 1970 թ.-ին, իր մահվանից մեկ տարի առաջ։ Ծառն արդեն 47 տարվա պատմություն ունի:
Ինչպես Sputnik Արմենիայի թղթակցին ասաց թանգարանի տնօրեն Ավետիք Գրիգորյանը` Սևակը խիստ ուշադիր էր իր ստեղծած ամեն ինչ նկատմամբ, երբ այգին էր մշակում, հոգի էր ներդնում ամեն գործողության մեջ։ Երևի դա է պատճառը, որ ծառն աներևակայելի մեծ չափերի է հասել։
Ինչպես է կառուցվել թանգարանը
Հանրահայտ բանաստեղծի տուն թանգարանն իր հայրենի Զանգակատուն գյուղում է։ Գրողի տնից ոչ հեռու, իր հիմնած դրախտային այգում է գտնվում այն։ Այստեղ էլ տեղադրված է 1971թ.-ին ավտովթարից միասին մահացած Պարույր Սևակի ու նրա կնոջ` Նելլի Մենագարիշվիլիի տապանաքարը։
«Բանաստեղծի մահից հետո որոշում կայացվեց հիմնել Պարույր Սևակի տուն-թանգարանը։ Թանգարանի կառուցումը վստահվել է Ջիմ Թորոսյանին։
Նախագիծը նախատեսում էր մի ամբողջ թանգարանային համալիրի կառուցում` ճեմասրահ, զանգակատուն` արևելյան կողմից մատուռով (Սևակի «Անլռելի զանգակատուն» պոեմի յուրօրինակ հուշարձան), ցուցասրահներ», — պատմեց Գրիգորյանը։
Նրա խոսքով` այստեղ նախատեսվում էր նաև ամֆիթատրոն կառուցել` գրական երեկոներ և Սևակին նվիրված այլ միջոցառումներ անցկացնելու համար։
«Ցավոք, միայն ճեմասրահը կառուցվեց։ Եվ հենց այստեղ բացվեց ցուցադրությունը, որն այսօր հասանելի է այցելուներին», — նշեց թանգարանի աշխատակիցը։
Թանգարանի ֆոնդը հետզհետե հարստանում է, մասնավորապես, Սևակին նվիրված բանաստեղծություններով։
Բանաստեղծի հուշերը պահող իրերը
Այսօր Զանգակատանը կարելի է տեսնել բազմաթիվ իրեր, որոնք Սևակին են պատկանել. դպրոցական տարիների գրքեր և տետրեր, շնորհակալագրեր, դպրոցական ատեստատն ու հայտնի կապույտ վերնաշապիկը։
Բանաստեղծի որդու` Արմեն Ղազարյանի շնորհիվ Երևանից բերվել են Սևակի անձնական իրերը։ Ինչպես Sputnik Արմենիային պատմեց մեր զրուցակիցը` թանգարանի համեստ անկյունում այս իրերը տեղադրվել են հենց այնպես, ինչպես դրանք դրված են եղել Սևակի երևանյան աշխատասենյակում։
Ավելի ուշ որոշում է կայացվել թանգարանի պատերը զարդարել բանաստեղծի կյանքի մասին պատմող մեծ որմնանկարներով։ Այդ մտահաղացումը կյանքի է կոչել նկարիչ Սուրեն Մուրադյանը։
