ԵՐԵՎԱՆ, 18 մայիսի — Sputnik. Այսօր ԵԱՀԿ գլխավոր քարտուղար Լամբերտո Զանիերը հայտարարել է, որ կազմակերպությունը ստիպված է սկսել ԵԱՀԿ երևանյան գրասենյակի փակման գործընթացը։ Այն կդադարեցնի իր գործունեությունը 2017թ. օգոստոսի 31-ից: Այս մասին տեղեկացնում են ԵԱՀԿ լրատվական ծառայությունից:
Հայտարարության մեջ նշվում է, որ ԵԱՀԿ երևանյան գրասենյակի փակումը հետևում է մի քանի ամիսների բանակցություններին ու 2016թ. ԵԱՀԿ գերմանական նախագահության և 2017թ. ԵԱՀԿ ավստրիական նախագահության նշանակալի ջանքերին, որոնք ուղղված էին մանդատի երկարաձգման հետ կապված փակուղու հաղթահարմանը:
Գլխավոր քարտուղար Զանիերը նշել է, որ ԵԱՀԿ երևանյան գրասենյակը, իր նվիրված անձնակազմով, նշանակալի ներդրում է ունեցել ԵԱՀԿ-ի առջև ստանձնած Հայաստանի իշխանությունների հանձնառությունների իրականացման աջակցության և խորհրդատվության հարցում:
«Հայաստանի հետ համագործակցությունը միշտ էլ արգասաբեր է եղել»,- նշել է նա: Գլխավոր քարտուղարը հիշեցրել է, որ, ի թիվս այլ հարցերի, Հայաստանում ԵԱՀԿ գործունեության մեջ մտնում էին ոստիկանության բարեփոխումներին օժանդակությունը և աջակցությունը բիզնես գործունեությանն ու քաղաքացիների ամենօրյա կյանքին վերաբերող օրենսդրության վերանայմանը:
2006թ-ին ԵԱՀԿ երևանյան գրասենյակը ստեղծել է ծրագրերի իրականացման կենտրոն Սյունիքի մարզում՝ նպաստելու կայուն զարգացմանը: Գլխավոր քարտուղար Զանիերը կարևորել է այն հանգամանքը, որ կառույցը շարունակելու է լինել ներգրավված Հայաստանի՝ ԵԱՀԿ-ի հանդեպ գոյություն ունեցող հանձնառությունների շրջանակներում բոլոր երեք չափումներում՝ քաղաքական-ռազմական, տնտեսական ու բնապահպանական և մարդկային:
