ԵՐԵՎԱՆ, 17 մայիսի — Sputnik. Միասնական քննությունները մեկնարկելու են հունիսի 2-ին։ Ամեն երեքշաբթի և ուրբաթ քննություններ կանցկացվեն։ Առաջին փուլը կավարտվի հունիսի 23-ին:
«Երևանում, մարզերում և Արցախում կահավորման գործընթացներ են ընթանում, այսինքն`տեղադրվում են տեսախցիկներ ու խլացուցիչ սարքեր: Միասնական քննությունների թեստերը տպագրված փաթեթավորված են Լոնդոնում, Հայաստան կտեղափոխվեն միայն քննության օրը»,-ասաց Գնահատման և թեստավորման կենտրոնի տնօրեն Արա Իսպիրյանը։
Նրա տեղեկացմամբ` միասնական քննություն հանձնելու ցանկություն ունեցող 9 737 դիմորդ կա։ Ընդ որում` սա առաջին փուլում հայտագրված դիմորդների քանակն է։ Նախորդ տարվա համեմատությամբ այս թիվը 1500-ով պակասել է:
ԳԹԿ տնօրենը սա մեկնաբանում 12-ամյա կրթությամբ պայմանավորված ոչ ստանդարտ կազմակերպման հետևանք։
«Ըստ տարածաշրջանների՝ ամենից շատ դիմորդները Երևանից են՝ 3101, իսկ ամենից քիչը՝ Վայոց ձորից՝ 243»,-ասաց նա։
Ամենաշատ դիմորդները հայոց լեզու և գրականություն առարկայից են՝ 5191, ամենից քիչը՝ համաշխարհային պատմությունից՝ 88 դիմորդ:
