ԵՐԵՎԱՆ, 17 մայիսի — Sputnik. Մայիսի 16-ին Թուրքիայի նախագահը պաշտոնական այցով մեկնել է Միացյալ Նահանգներ։ Նրա այցի ժամանակ Էրդողանի դեմ կազմակերպված խաղաղ ցույցի մասնակիցների վրա հարձակվել են էրդողանամետ թուրք ազգայնական ուժեր, որոնց վայրագ գործողությունները չէին կարողանում կանխել անգամ ամերիկյան ոստիկաննները։ Այս մասին տեղեկացնում է hairenikweekly.com-ը։
The Washington Post-ի տեղեկություններով՝ բախումների հետևանքով ինը մարդ է վիրավորվել, նրանք տեղափոխվել են հիվանդանոց: Վաշինգտոնի ոստիկանության խոսնակ Դասթին Սթերնբեքը նշել է, որ երկու մարդ է ձերբակալվել:
Ցույցը կազմակերպվել էր Ամերիկայի Հայ Դատի հանձնախումբի, Ամերիկայի Հելենական խորհուրդի և մի շարք քրդական և ասորական կազմակերպությունների կողմից։
«Սա այնպիսի բռնություն էր, որ երբեք չեք սպասի տեսնել ԱՄՆ մայրաքաղաքում: Դա այնպիսի բռնություն էր, որ կարելի է տեսնել Էրդողանի Թուրքիայում և այլ բռնապետություններում»,- ֆեսբուքյան իր էջում գրել է Ամերիկայի Հայ դատի հանձնախմբի գործադիր տնօրեն Արամ Համբարյանը` նաև հարձակման մի մասը ուղիղ հեռարձակելով սոցցանցում:
Erdogan’s Bodyguards Beat Up Protesters At Ambassador's Residence In Washington, D.C. https://t.co/emv8j1fFSF @dailycaller pic.twitter.com/v4VtEmYh2f
— Chuck Ross (@ChuckRossDC) 17 мая 2017 г.
Արամ Համբարյանը տեսանյութում պատմել է, որ Թուրքիայի դեսպանի նստավայրի մոտակայքում գտնվող կանաչ տարածքում ցուցարարները խաղաղ ցույց են անցկացրել, երբ փողոցի մյուս կողմից մի խումբ էրդողանամետ ցուցարարներ ճեղքել են ոստիկանական պատնեշը և հարձակվել ցուցարարների վրա:
«Սա այն բռնությունն է, որ տեսնում ենք Անկարայում, և նրանք այն բերում են այստեղ: Մի բան է Թուրքիայի իշխանությունների համար դա անել իր սեփական քաղաքացիների նկատմամբ, դա սարսափելի է: Մեկ այլ բան է մեզ՝ ամերիկաբնակներիս համար, տեսնել, թե ինչպես է դա տեղափոխվում Միացյալ Նահանգներ»,- ասել է Համբարյանը:
Էրդողանի պաշտոնական այցելության դեմ կազմակերպված ցույցը տեղի էր ունենում Վաշինգտոնում, թուրքական դեսպանատան մոտ։
