ԵՐԵՎԱՆ, 16 մայիսի-Sputnik. Կարեն Կարապետյանը ֆեյսբուքյան իր էջում աղյուսակ է ներկայացրել, որտեղ տեղ են գտել նշված ժամանակահատվածում 2016-ի նույն ժամանակահատվածի համեմատ ներմուծման 17,9 տոկոսով և արտահանման 16,5 տոկոսի աճը: Այս տվյալները հիմք են հանդիսացել տնտեսագետ Վիլեն Խաչատրյանի վերլուծության համար։
«Մեր ներմուծումը 2015 թվականին կրճատվեց մոտ 1 միլիարդ 200 միլիոն ԱՄՆ դոլարով, նշանակում է, որ 2015 թվականի համեմատությամբ մեր ազգաբնակչությունը գրեթե յուրաքանչյուր ամիս 100 միլիոն դոլար քիչ է ներմուծել։ Այսինքն` պոտենցիալը, որ մենք ժամանակին ապրում էինք ավելի լավ, բնակչությունն ավելի գնողունակ էր, կարողանում էր գնել ներմուծված ապրանքները, տնտեսության մեջ ավելի ակտիվ էր, դա կրճատվել է»,-ասաց Խաչատրյանը։
Դրա ֆոնին արտահանման որոշակի աճ է արձանագրվել։ Այսինքն, ըստ Վիլեն Խաչատրյանի, մենք աշխարհից ավելի քիչ վերցնում ենք, ավելի շատ` տալիս։
«Եթե դա եղել է բնակչության բարեկեցության հաշվին, ես դա գնահատում եմ բացասական։ Եթե դա եղել է ոչ թե բարեկեցության, այլ տեղական արտադրանքով փոխարինելու հաշվին, ես դա գնահատում եմ դրական։ Բայց, այնուամենայնիվ, մենք 2016 թվականը փակել ենք ընդամենը 0.2 տոկոս ՀՆԱ-ի աճով։ Դա նշանակում է, որ տնտեսական աճի հաշվին չէ, որ մեր ներմուծումը կրճատվել է, այլ վատ ապրելու հաշվին»,-ասաց նա։
Տնտեսագետի խոսքով` մեր արտահանման 70-80 տոկոսը բաժին է ընկնում մոտ 4 ապրանքախմբերի, դրանց թվում են թանկարժեք մետաղները։
«Այս դեպքում բնակչությունը օգուտ քաղելու հնարավորություն միայն բյուջեից ստացած հարկերի միջոցով է կարողանում ունենալ։ Մնացած առումով այդ արտահանումն ազդեցություն չի ունենում ազգաբնակչության վրա»,-ասաց նա։
Վիլեն Խաչատրյանն անընդունելի է համարում արտահանման ու ներմուծման տեսանկյունից որևէ երկրից կախում ունենալը։ Ըստ նրա` չունենք խելացի մշակված, դիվերսիֆիկացված տնտեսական քաղաքականություն, այլ շարունակաբար մեծացնում ենք որոշ երկրներից կախվածությունը։
