ԵՐԵՎԱՆ, 15 մայիսի — Sputnik. Պոլսահայ լրագրող, «Ակոս» թերթի հիմնադիր և նախկին խմբագիր Հրանտ Դինքի սպանության գործի շրջանակում նախօրեին վկայություն է տվել Թուրքիայում հայտնի մաֆիայի պարագլուխ Քյուրշաթ Յըլմազը, որը հայտարարել է, որ թուրք կրոնական քարոզիչ Ֆեթուլլահ Գյուլենի «Հիզմեթ» խմբավորման անդամներն Անկարայում նրան առաջարկել էին կազմակերպել Դինքի սպանությունը: Այդ մասին հայտնում է tet.am-ը՝ հղում անելով թուրքական «Սյոզջու» պարբերականին:
Որպես վկա հանդես եկած Քյուրշաթ Յըլմազը նշել է, որ Դինքի սպանությունից որոշ ժամանակ առաջ նրան հանդիպման են հրավիրել «Հիզմեթ»-ի՝ Անկարայում գործող ներկայացուցիչներից մեկի` Իսմայիլ Է.-ի հետ ու խոսել հայ լրագրողի մասին:
«Ասացին, որ նա (Դինքը) փորձում է ակտիվացնել հայկական լոբբին Թուրքիայում, մեր երկրի համար մեծ վտանգ է ներկայացնում, և առաջարկեցին ստանձնել նրա սպանության գործը», — ասել է Յըլմազը` հավելելով, որ հանդիպումը տեղի է ունեցել գյուլենականներին պատկանող մի հյուրանոցում:
Նա նաև մանրամասնել է, որ Իսմայիլ Է.-ն խոսել է ձախակողմյան քաղաքական կողմնորոշում ունեցող քուրդ ալևիների մասին և նշել նրանց համայնքի ականավոր գործիչներին «ոչնչացնելու անհրաժեշտության» մասին:
«Երբ չընդունեցի նրանց առաջարկը` սկսեցին իմ և իմ ընկերուհու` Թուղբա Օզայի դեմ թակարդ լարել», — նշել է Յըլմազը:
Ըստ նրա` գյուլենականներն իրենց ուժը ցույց տալու համար նույնիսկ ձեռքի շարժումով ցույց են տվել այն ժամանակ վարչապետի պաշտոնը զբաղեցնող Ռեջեփ Թայիփ էրդողանի նստավայրն ու ասել` «Եթե ուզենք` այստեղից վարչապետին անգամ կխփենք»:
Հրանտ Դինքը սպանվել է 2007թ.-ի հունվարի 19-ին` Ստամբուլի Շիշլի թաղամասում գտնվող «Ակոս» թերթի խմբագրատան առջև` 16-ամյա թուրք ազգայնական Օգյուն Սամասթի կրակոցից: Հրանտ Դինքի սպանության վերաբերյալ դատավարությունը ձգվում է արդեն 10 տարի և դեռևս չի գտել իր հանգուցալուծումը:
