ԵՐԵՎԱՆ, 15 մայիսի — Sputnik, Արմենուհի Մխոյան. Թուրքայի թատերախումբը Պարոնյան ներկայացրեց թուրքերեն՝ հայերեն ենթագրերով: Պարոնյանական սուր երգիծանքն ավելի էր ընդգծված նյութական շահի վրա կառուցված անհամապատասխան ամուսնությունների, ներընտանեկան հարաբերությունների, դավաճանության մասին պատմող պիեսում: Թատերախմբի ռեժիսոր՝ Էնգին Ալքանը, ով նաև գլխավոր դերակատարն էր, հագուստներին ու դիմահարդարմանն անսպասելի լուծումներ էր տվել: Դերասանական խաղն ավելի ծիծաղելի էր դարձնում իրավիճակը:
Եթե դերասանների խաղը հանդիսատեսին ծիծաղ պատճառեց, ապա թատերախմբի հայաստանյան հյուրախաղերն այնքան էլ հարթ չեն անցել: Sputnik Արմենիայի այն հարցին, թե չկար մտավախություն՝ Հայաստանում ներկայանալու, ռեժիսորը պատասխանեց. «Մենք այս ներկայացումով Թուրքիայում լիքը դահլիճներ ենք հավաքել, ու այն շատ լավ է ընդունվել հանդիսատեսի կողմից: Մեզ համար երազանք էր Պարոնյան ներկայացնել հենց Հայաստանում, իսկ մտավախություն չի եղել, չնայած մեզ Թուրքիայում ասում էին, որ չգանք, իսկ Գյումրիում էլ դահլիճ խնդիր ունեցանք, բայց, ամեն դեպքում, մենք այստեղ ենք ու ուրախ ենք, որ կարող ենք ներկայացնել Պոլսում ծնված 19-րդ դարի լավագույն հայ հեղինակներից մեկի՝ Հակոբ Պարոնյանի գործը, որն այդ ժամանակի հենց Օսմանյան կայսրության բարքերն ու վարքերն է քննադատում»,-նշեց Էնգին Ալքանը՝ հավելելով, որ այս ներկայացումը շնորհակալական խոսք է մի հեղինակի, ում ավանդը մեծ է Թուրքիայի դասական թատրոնի ստեղծման գործում:
«Պարոնյանը մեր երկու մշակույթներն իրար կապող օղակ է որքան հայերինն, այնքան էլ թուրքերինն է: Դասագրքերում էլ Պարոնյանը ներկայացվում է որպես Օսմանյան կայսրության հայ երգիծաբան, գրող: Որքան էլ քաղաքական գործիչները փորձեն մեզ հեռացնել, թատրոնը հազարամյակների ընթացքում փորձում է միմյանց հաշտեցնել ու բարիդրացիական կապերի մեջ պահել: Մենք պետք է երկխոսություն սկսենք մշակույթի լեզվով»,-նշեց ռեժիսորը:
Բյուրսայի Նյուլուֆերի քաղաքապետարանի երիտասարդ՝ 3 տարվա պատմություն ունեցող թատերախումբը պարոնյանական երգիծանքին անդրադառնում է առաջին անգամ, իսկ Ստամբուլի 130 տարվա պատմություն ունեցող թատրոնը 2007 թվականին հենց նույն գործը ներկայացրել է Բուրսայում ու Ստամբուլում՝ ունենալով ավելի քան 300-500 հազար հանդիսատես:
Գյումրիում կազմակերպիչներին դժվարությամբ է հաջողվում դահլիճ գտնել. տարբեր պատճառաբանություններով շատերը դահլիճ չեն տրամադրում, իսկ կազմակերպություններից մեկը, որի հետ արդեն պայմանագիր կար կնքած, ներկայացումից 1 օր առաջ չեղյալ է համարել պայմանավորվածությունը՝ դժվարին իրավիճակում դնելով թատերախմբին: Ամեն դեպքում, «Մհեր Մկրտչյանի» անվան պալատում հաջողվեց երաժշտական կատակերգությունը ներկայացնել, որը փոքրաթիվ հանդիսատեսը, այնուամենայնիվ, հավանեց: Մշակույթը հաղթեց դիվանագիտությանը:
Մայիսի 16-ին այն կներկայացվի նաև Երևանի «Հ. Ղափլանյանի անվան» դրամատիկական թատրոնում:
