ԵՐԵՎԱՆ, 15 մայիսի — Sputnik. Բելառուսում Հայաստանի քաղաքացի է ձերբակալվել մարդկանց ապօրինի տեղափոխում կազմակերպելու մեղադրանքով։ Այս մասին հայտնում է ՌԻԱ Նովոստին` հղում անելով Բելառուսի պետական սահմանապահ կոմիտեին։
Օպերատիվ-հետախուզական միջոցառումների ընթացքում սահմանապահ ծառայության օպերատիվ ստորաբաժանման աշխատակիցները կասեցրել են միջազգային հանցավոր խմբի գործունեությունը։
«Շուչինսկի շրջանում, պետական սահման տանող ավտոճանապարհի վրա կանգնեցվել է Peugeot մակնիշի ավտոմեքենա, որում եղել են Ռուսաստանի երկու քաղաքացիներ (ծնունդով Չեչնիայից և Դաղստանից), ինչպես նաև Հայաստանի քաղաքացի: Նրանք Վիետնամի չորս քաղաքացու էին տեղափոխում», — գրված է հաղորդագրության մեջ։
Նշված է, որ «չարագործների հանցավոր սխեման հետևյալն էր` վիետնամցի միգրանտներին Մոսկվայից տեղափոխել Լիտվա Բելառուսի տարածքով»։
Սահմանապահ կոմիտեի տվյալներով` Ռուսաստանի և Հայաստանի քաղաքացիների նկատմամբ քրեական գործ է հարուցվել «նախնական պայմանավորվածությամբ մի խումբ անձանց կողմից ապօրինի միգրացիայի կազմակերպում» հոդվածով, որի համաձայն` պատիժ է սահմանվում 3-7 տարի ազատազրկմամբ` գույքի բռնագրավմամբ կամ առանց դրա։
