ԵՐԵՎԱՆ, 14 մայիսի — Sputnik. Հայաստանը ճգնաժամի մեջ է, հատկապես` Ազգային ժողովի` ապրիլի 2-ին տեղի ունեցած ընտրություններից հետո։ Այս մասին լրագրողներին ասաց «Երկիր ծիրանի» կուսակցության առաջնորդ, քաղաքապետի թեկնածու Զարուհի Փոստանջյանը։
Ըստ նրա` այդ «ճգնաժամից» դուրս գալու համար պետք է ազգային դիմադրության շարժում ստեղծել։ Այդ կապակցությամբ նա մանրամասներ է ներկայացրել այսօրվա միջադեպից` նշելով, որ իրավապահ մարմինների աշխատակիցներն ուժ են գործադրել իր և դստեր նկատմամբ։
Զարուհի Փոստանջյանն այսօր ցերեկը մի քանի համակիրների և դստեր հետ մտել է ՀՀԿ քաղաքապետի թեկնածու Տարոն Մարգարյանի շտաբ և պահանջել ցույց տալ սեղանի դարակների պարունակությունը։ Նա պնդել է, որ այնտեղ են դրված ընտրակաշառք ստացած անձանց ցուցակները։
«Մենք փորձեցինք ստանալ այդ ցուցակները և հանրությանն ու ԶԼՄ-ներին հասանելի դարձնել դրանք, իսկ շտաբի պետը հրաժարվեց ցույց տալ քաղաքացիների անուններով ցուցակը», – ավելացրեց Փոստանջյանը։
Իրավապահ մարմինների աշխատակիցները դուրս են հրավիրել Փոստանջյանին և փորձել են բերման ենթարկել, սակայն նա մեքենա չի նստել։ Փոստանջյանի դստերը տարել են ոստիկանության մեքենայով, այնուհետև ազատ են արձակել։
ՀՀԿ մամուլի քարտուղար Էդուարդ Շարմազանովն իր հերթին հայտարարել է, որ «Երկիր ծիրանի» ընդդիմադիր կուսակցության քաղաքապետի թեկնածու Զարուհի Փոստանջյանի` ընտրախախտումների վերաբերյալ մեղադրանքները հիմնազուրկ են, իսկ գործողություններն` անօրինական։
«Նա ՀՀԿ շտաբ մտնելու որևէ իրավունք չունի: Ինչ վերաբերում է ցուցակներին, ո՞վ է ասել, որ որևէ մեկը ցուցակ ունենալու իրավունք չունի: Ի՞նչ իրավունքով է նա մտել նախընտրական շտաբ և խոչընդոտում այդ պահին մեր ակտիվի աշխատանքը: Իսկ այդ ցուցակները մեր ակտիվի ցուցակներն են, մի քանի ցուցակ էլ ինձ մոտ կա, կարող է գալ, ինձնից էլ պահանջել: Ես, որպես շտաբի պետ, իրավունք ունեմ ունենալու և´ ակտիվի, և´ կուսակիցների, և´ ընտրողների ցուցակներ», — ասել է Շարմազանովը։
Երևանում ավագանու ընտրությունների քվեարկության ավարտին հաշված րոպեներ են մնացել։ Ընտրություններին մասնակցում է քաղաքական երեք ուժ` ՀՀԿ-ն, «Երկիր ծիրանի» կուսակցությունն ու «Ելք» դաշինքը։
Հայաստանի հանրապետական կուսակցության քաղաքապետի թեկնածուն գործող քաղաքապետ Տարոն Մարգարյանն է, «Երկիր ծիրանի» կուսակցության թեկնածուն` Զարուհի Փոստանջյանը, իսկ «Ելք» դաշինքինը` Նիկոլ Փաշինյանը։
