ԵՐԵՎԱՆ, 14 մայիսի — Sputnik. ՀՀ պաշտպանության նախարար Վիգեն Սարգսյանն իր քաղաքացիական պարտքը կատարեց Երևանի թիվ 9/47 ընտրատեղամասում Երևանի ավագանու ընտրություններին: Նա քվեարկության էր եկել կնոջ և դուստրերի հետ:
«Մենք բացառիկ սիրուն քաղաք ունենք, որը շատ խորը պատմական արմատներ ունի, իր ուրույն բնավորությունն ու միջավայրը: Կարծում եմ, որ սա շատ հաճելի քաղաք է ապրելու համար»,- ասաց պաշտպանության նախարարը:
Նա ուրախությամբ նշեց, որ տարեցտարի բարեկարգվում են այգիները և պուրակները։
«Շատ եմ կարևորում կանաչ գոտիների առկայությունը և շատ կուզեմ, որ առաջիկա տարիներին քաղաքում ունենանք մի մեծ զբոսայգի»,-ասաց նախարարը:
Երևանի ավագանու ընտրությունը մեկնարկել է առավոտյան 08։ 00–ին։ Ընտրություններին քաղաքական երեք ուժ է մասնակցում` ՀՀԿ-ն, «Երկիր ծիրանի» կուսակցությունն ու «Ելք» դաշինքը։
Հայաստանի հանրապետական կուսակցության քաղաքապետի թեկնածուն գործող քաղաքապետ Տարոն Մարգարյանն է։ «Երկիր ծիրանի» կուսակցության թեկնածուն` Զարուհի Փոստանջյանը, իսկ «Ելք» դաշինքինը` Նիկոլ Փաշինյանը։
